عن وكتنه وحالته وشما يصير

عن وكتنه وحالته وشما يصير
ارد اسولف عنه واضرب چم مثال
بالمباشر احچي مالف وادوور
ما احب ادخل نقاش ولا جدال
زين اعرف بالاگصده اشگد چبير
مايكفي شما گلت اكبر مقال
بالسهل والممتنع اكتب سطور
ما اريد ارسم صور من الخيال
عدنه ناس ملونه كل ساعه لون
عدهم الدنيه اصبحت غايه ومنال
لو حچو تحسبهم اخيار وكرام
اتسترو بالدين وافعال الرجال
بالمكر لبسو لباس الصالحين
هالمكر شيطاني هز حتى الجبال
وعدنه ناس اتسوي الاعوج مستقيم
واصبح اعوج كل طريق الاعتدال
گطعو اوتار الوصل من الضمير
بين حگ ومرحمه ضاع الوصال
فلشو اركان المضيف لكله خير
عالبخت ما واحد ليسأل سؤال
عدهم الطيب لئيم ولو خبيث
وليحب الخير منبوذ الخصال
مبدء الاخلاق اصبح شي عقيم
والرذيله اتغطت بعز ودلال
سحكو اعله المستحه وراح الحياء
شغله حلوه صارت القيل اويه قال
كل خيانه اصبحت فن وذكاء
والوفه اصبح قديم وشي مُحال
صار ياوسفه الچذب عدهم جميل
للصدگ وبهالوكت ما ظل مجال
هدمو كل مستحه وراح الحياء
والرذيله اتغطت بحب ودلال
العفه والحشمه تخلف عدهه صار
والتعري صار نوع امن الكمال
شرعي اصبح للبعض نهج الحرام
شرعن اسباب النصب والاحتيال
الحرمه كلهه بهالوكت صارت بلاش
كلش ايكلف صبح درب الحلال
صارت الاموال معنى الاحترام
والفقر عيب وخزي مابي جمال
حتى لو ماله حرام بنص حرام
يصير اعز امن الاخول لبجيبه مال

المقصر الصغير
ابو لقاء