اجلبنّك يليلي والحراره تزيد

بمناسبة ارتفاع درجات الحراره وإنقطاع الماء تماما..
كتب الشاعر حسين الشيباني قصيدة على وزن التجليبه يگول..
(( تجليبات كهربائيه ... ما تنتل ))
***************************
اجَلْبَنَك يليلي .........والوضع خربان
اليْوَّزِن عملها........... وخربط الكبّان
شكبنّه اليغثن.......... كلهن بشكبان
اليشك ثوبه ويهوّس منهو اليعيبه؟
......
أجلبنّك يليلي ........والوطن عطّاب
جِدَح مَلزَم جمرها.. وينكل الحطّاب
اليكول الحك يلاهي.. ينذم وينعاب
ويكولون الشعب كثرت مطاليبه
.......
اجلبنّك يليلي .........والثلج ضايع
الربع بالفين بوري ..ويوصلك مايع
تظل دنيانه تطلك..... والخبر شايع
تعبانه ومعسره وما ظن اتجيبه........
......
اجلبنك يليلي ............وناطر انطاره
شرد عنّي البخيخ ....وضاعت أخباره
أحلّفكم وضعنه ............منهو فجّاره؟
وياهو البلوطن تنهش مخاليبه ........!!
.......
اجلبنّك يليلي .........والوضع فيطي
عرايا اتصلّخو ......چومة زعاطيطي
اخطط بالنفاهه...... وتالي تخطيطي
خرب بأول قطع ياخيبة الخيبه......
.......
اجلبنك يليلي .........وبالقهر عايش
شمس الله علينه....... فرّت القايش
البنكه نحيله ........والضوه يرامش
والصاح انظلمنه يننتف شيبه........
.......
اجلبنك يليلي ...........والحراره تزيد
واخلصنّك ونيده........ وناطر التبريد
مثل فحل الاخضيري والسبح شيفيد
وكمنه اعله الشمس نطبخ التشريبه.....
.......
ذب الله علينه.......... بالشمس غيضه
ما تحتاج نار ...........وتنكلي البيضه
جن عفريت صيفك........ فازع بكيضه
وظل غايب شتانه وطوَّل الغيبه.......

شجلبنّك يليلي........... بطَلِت تجليب
مثل ظيم المعسره الماوراها اتجيب
شنحطله جرحنه ....وينلتم ويطيب ؟
تره الفجار روحه ايضيع تطبيبه

......... .........