سوالفنـا عراقيـة .

بس اني موجودة بل المنتدى اليوم شنو السالفة

السلام عليكم اصدقائي....
يوم من الايام حبوبتي سولفتلي سالفه واني أدري بيها صادقه ماتچذب بس شو هاي السالفه ماطبت بعقلي....
تگول يحبوبه أكو حراميه ثنين موچدين بيت بيه ليرات ذهب وفلوس هوايه راحو يبوگونهن ..
تگول يحبوبه باگوهن وطلعو من البيت بس الليرات والفلوس هوايه گوه ياله مشو بيهن مسافه صادفهم واحد عنده مطي صاحوله گالوله تعال انت صير ثالثنا وشريچ ويانه بس نحط الحمل عالمطي مالتك...
يحبوبه الرجال وافق وحطو الحمل عالمطي ويمشون ثلاثتهم وبنص الدرب ذوله الحراميه الاثنين إستطمعو وصار رايهم يكتلون الرجال راعي المطي..
يحبوبه وصدك كتلوه وظلو اثنينهم الحراميه والمطي مشو مسافه واحد منهم لعب بعقله الشيطان گال ليش ماأكتل صاحبي وتظل هاي الثروه والفلوس كلها إلي وحدي گام على صاحبه كتله ظل بس هو والمطي تعب الحرامي من المشي گام ركب عالمطي ومشه مسافه والدنيا ظلمه عثر المطي ومن عثر المطي وگع الحرامي على راسه ومات بالمچان ..
يحبوبه ومن طر الفجر المطي يندل أهله رد لهله وجايبلهم كل هاي الفلوس والليرات..
گتلها حبوبه أوگفي انت تضحكين عليه بهاي السالفه!!! گالت لا يحبوبه ماعيب اني ماضحك عليك هاي السالفه صدك سولفتها إلي حبوبتي من چنت بعمرك وحبوبتي هم مسولفتلها حبوبتها.. قابل حبوباتك يچذبن ؟؟
گتلها لا حشاهن مايچذبن بس حبوبه گليلي اذا الحراميه ماتو وصاحب المطي مات چا هاي السالفه من سولفها؟ # قابل المطي سولفها!!
وتدرون حبوبتي عدها الجواب.. گالت اي سولفها المطي گتلها حبوبه وين أكو هيچ حچي گالت چاانت كلشي ماتعرف گتلها حبوبه إنت فهميني گالت بحبوبه گبل چانت كل الدوارج والحيوانات تحچي ...
گتلها حبوبه ماكو هيچ حچي گالت چا انت صارلك سنين تروح تدرس ماعلموك هاي چا شعلموك ؟
گالت مو النبي سليمان بعد عيني يسولف ويه الدود والنمل ويسولف ويه الحيوانات والطيور چا إنت ماسامع بسالفة النبي سليمان فدوه لأسمه ويه الهدهد...گتلها حبوبه سامعها... چا مو أگلك انت كلشي ماتعرف إطيني جرد عباتي خل أگوم أنام گتلها حبوبه بعد وكت گالت لا اني زعلت وبعد ماسولفلك.. گتلها ليش حبوبه گالت ما عيب عليك تچذبني إني وحبوباتك بس انت ماعليك عتب العتب عليه اني أگعد وسولفلك..
وراحت حبوبتي زعلانه وهاي الحيره لو أصدج المطي يسولف لو تزعل وهاي شلون نحلها!!
حبوبتي ذكرتني بسوالف بعض الموامنه يجيبلك روايه مدري منين مامنين ويريدك تصدج بيها وإذا گتله هاي غلط تنگلب عليك الدنيه ويكفرك ويفسقك وحتى الناس الگاعدين يمه يطبگون وياه...وشلون تاليها ماندري لازم نصدك بحچي حبوبتي وحچي المومن..
وتعيشون وتسلمون

قبل كم يوم كنت في أحد محاكم العراق ، لإكمال بعض الأوراق، وأنت بقاعة المحكمة الكبيرة وبين الوجوه المتعددة تسمع صوت يجيك من رجل غاضب ( الكلبة بنت الكلب هي والقندرة ) وهناك يجيك صوت بعيد من مكان آخر بنبرة حادة لأنثى صغيرة ( الكلب ابن الكلب هو والنعال ) ؟
بالمحكمة تشاهد دموع وتشاهد كبار سن وتشاهد أرث مأكول وتشاهد نصاب خان العشرة وتشاهد بنات صغيرات حلوات جايات يطلگن لو يطالبون بنفقة، ترافقهم أمهات مرسوم على وجوهم علامات الحزن والندم على تزويجهم وآباء ابتزهم نسيبهم السابق بالتنازل عن المقدم والمؤخر

فعلاً مثل ما قالوا ( النهايات أخلاق ) وشرف الخصومة وسام مو كل انسان يناله ، لان جميع هذه الاطراف المتخاصمة كانت في يوم ما أهل واصدقاء وبينهم ضحكة وزاد وملح ، لكن كلمن يرده حليبه .

ظلت عدكم العافية

♡♡Princess♡♡ قال:

بس اني موجودة بل المنتدى اليوم شنو السالفة

أنقر للتوسيع...

ههههههه
اني هم مثلج
مرات ادخل الاكيني بس اني وفراس المدير
والفخامه تصوصي ههههه

بس ورا كم دقيقه يجي بعض الاعضاء
بس مثل ناكوط الحب بالكسر مو بالضم

امد روحي غليچة گيض وادگن بالبحت نچمة
وأفلس رگبة العرموط وأتمعط دبگ وأحمه



@وهج الحروف🔥 @madness man

سولفولي شنو يكول الشاعر بس امانه مو تبحثون

حنان البصرة قال:

امد روحي غليچة گيض وادگن بالبحت نچمة
وأفلس رگبة العرموط وأتمعط دبگ وأحمه



@وهج الحروف🔥 @madness man

سولفولي شنو يكول الشاعر بس امانه مو تبحثون

أنقر للتوسيع...

الغليجة والكيض والبحت كلها معروفة
والعرموط مااعرفه ههههههههههههه بس طيب اذا لاحك

حنان البصرة قال:

امد روحي غليچة گيض وادگن بالبحت نچمة
وأفلس رگبة العرموط وأتمعط دبگ وأحمه



@وهج الحروف🔥 @madness man

سولفولي شنو يكول الشاعر بس امانه مو تبحثون

أنقر للتوسيع...

هههه
من غير بحث وتنقيب

اعتقد
الغليجه هي مثل عباءة الرجل
والكَيظ الصيف الحار
والبحث تمن بالحليب
والعرموط معروف
والمعنى بيه حسجه على ما اعتقد

يارب تفسيراتي صح.