إذا جاب الزمان عليك شرن
وصار العيش في دنياك مرن
لا تجزع وتنسى الحاضر البيه
شكثر حلوات من أيام خلصن
ولو ضاقت عليك الأرض فد يوم
تنام وتكعد وتبتسم قهرن
الك رب أليريدك تبجي مرات
حتى تقول بعد العسر يسرن
وان جار الزمان عليك بالحيف
سل مولاك بالتوفيق اجرن
لعل الله يجزي الصابر أفراح
ويملي كل قلب مكسور صبرن
ولو حاطك ظلم من كل الاكتار
وصرت متهم بين الناس حصرن
لاتحزن وربك "منتقم" يوم
يصنعلك الحق ويهْب نَصرن
وان فرضوا عليك تكون مذلول
لا تخضع وعش دنياك حرن
الك رب اليّطَيب النفس والروح
ويسلخ من ظلام الليل فجرن
وان جار الصديق عليك باللوم
وينسى ألوفا ويجازيك هجرن
لا تندم ولا تسمح للأحزان
لان انت الوفي يكفيك فخرن
الحياة تريد منك تحذر الناس
كثير من البلايه تصير غدرن
فكم من مترف بالمال مغرور؟
تراه بيوم قد يزداد فقرن
يا دنيا غريبه بكل الأطوار
ولا نترك الك بالقلب قدرن
نمد ألأيد للرحمن.. هيهات
ترد ألأيد من العرش صفرن.
سومري
