ابيات ابو ذيه بقلمي اختر من منهن اقوى بنظرك

[محمد حسن ضيغم]

ابيات ابو ذيه بقلمي اختر من منهن اقوى بنظرك

ـــــــــــــــــــــــــ

(1)
مبرد ضيم دنيانه بردنه
او واحدنه مسح دمعه بردنه
بغيابك ياترف كلش بردنه
من اشوفنك شمس تطلع عليه
(2)
نغر نغره شريفه من نغرفه
وخذت من بحر شوكك منه غرفه
اخذ دلالي اجّر منه غرفه
ومقدّم هالسنه ايجارك عليه
(3)
الليالي ابورق همهن ترجمنّي
مجامل ادري وكتي ترجمني
اعرف ماي اشربك ترجه مني
دكلّي شلون وانت امجتف اديه
(4)
شماته اصبحوا كلبي الي حبلهم
تعثّر حوبتي ولتضن حبلهم
اعرف جذب حيّه اصبح حبلهم
اجيب منين عصة موسى اليه
(5)
يهل تنشد على عكلي نعم تاه
عليك وكمت ادك صبري نعمتاه
ابنادم لو علي زادت نعمتاه
اباله اصبح جبير اعله البريه
(6)
ببوي اقسم يصاح او وحك يداي
ابسبب غدر العزيز الجرح يداي
غريج وصاحني ومدّيت يداي
انقذته ودرفعاني وخان بيه
(7)
سهيل الميّزيته الهم من ايداي
انكروني ودايي ضل يطفح من ايداي
السبب يا صاحبي كلّه من ايداي
ردتهه اتعينهم عضوهه اليه
(8)
الناس براي ممشاهه وانه براي
حزين وصوتي بجّه الهم وانه براي
الناس ابرتهه بيهه اتشل وانه ابراي
تفتك اجروح ما هي اتخيط اليه
(9)
الي شور اعلع خواني والي راي
واليه بكل كلب منبع والي راي
بحر انه الي عاصف والي راي
ايخسه الشامت يطب ايفوج بيه
(10)
يحك دمعاتي اكتنهه واهلهه
بسبب ذبّل ورد روحي وهلهه
انه احبهه واهي اتحبني واهلهه
رضوا لاجن هلي العمّوا عليه​

 

[الشاعر الرياضي]

رد: ابيات ابو ذيه بقلمي اختر من منهن اقوى بنظرك

يهل تنشد على عكلي نعم تاه
عليك وكمت ادك صبري نعمتاه
ابنادم لو علي زادت نعمتاه
اباله اصبح جبير اعله البريه

الله الله
كم انت مبدع يلطيب
كم يروق لى التصفح كلماتك وطرحك الجميل الرائع
ربى يوفقك وربى يعليك يلغالى

 

[محمد حسن ضيغم]

رد: ابيات ابو ذيه بقلمي اختر من منهن اقوى بنظرك

شكرا لك اخي ابو مصطفى على مرورك الجميل

 

[رامي النجفي]

رد: ابيات ابو ذيه بقلمي اختر من منهن اقوى بنظرك

والله يا استاذنا جميعهن يستحقن الاقوى
مبدع دائما يا غالي
لاتحرمنا من اشعاركَ الرائعه
متابع لكَ و بـ شغف

 

[מـلـ♥ـڪ ألـבـ♥ـب ألـמـ♥ـدريـدي]

رد: ابيات ابو ذيه بقلمي اختر من منهن اقوى بنظرك

ببوي اقسم يصاح او وحك يداي
ابسبب غدر العزيز الجرح يداي
غريج وصاحني ومدّيت يداي
انقذته ودرفعاني وخان بيه

واكيد باقي الابوذيات لايقلن مستوى عن هذه لكنها لامستني باحساسها
دمت مبدعاً ومتألقاً

 

[محمد حسن ضيغم]

رد: ابيات ابو ذيه بقلمي اختر من منهن اقوى بنظرك

رامي النجفي
شكرا لك وشكرا لمرورك العطر

 

[محمد حسن ضيغم]

رد: ابيات ابو ذيه بقلمي اختر من منهن اقوى بنظرك

ملك الحب شكرا لك شوكرا لاختارك