يخيط من الشمس ليهمك الليل
تغار وتحترك ما الهه داعي
عليه شبيك لتصدك اليكرهون
ترى يدمر بلد سم الافاعي
يبعد الروح فضلتك ع الناس
والك طير الكلب وديته ساعي
وانا اخافن موت لاباجر تروح
وبالتخرج منهو يحمل فركتك
رايح وثوب التخرج جن خذاك
شجم كلب يراد واحمل غيبتك
شدتك هالروح احلك مستحيل
بالنفس هالروح صدك شدتك
وانه صار سنين اعيشلك غرام
وروحي احلام وقصايد خطتك
عمت عين الجامعه خلافك تصير
وامداها الروح لو يوم نستك
انته اذا باب الجامعه عيونه عليك
يعني حته الباب عاشك طبتك
جامعه وقاعات تهديلك سلام
وعاشكه الطلاب كلش صورتك
لأن مو مثل البشر شكلك عجيب
ولا اضن من طين منشأ خلقتك
يلزم الطبشور روحه بلايا ايد
على الصبوره يهلي بجيتك
ورفضت الصبوره جي غارت عليك
ذبت الطبشور هيه الكتبتك
انته اذا حته الدرج صافن عليك
لأن من تصعد يدوخ بوجنتك
وينسه كل طلابه ويعوف الدوام
وتصعد البايات تتبع صعدتك
