كالولك عليه ابعرسي فرحان ؟؟
سمعت ابديرتك هيج الخبر طاش!
يا حفلة زفاف الانته مو بي؟
ونه سابوح حزني وجيتك اكياش
جنازة مو عرس صارت بلياك
الغرفة كبر واللحد الفراش
يا فرحان؟ اموتن والله كل يوم
اموت اوعينك ال من شافهن عاش
من تنزل دمعتي غيرك اشلون
يمشهه وجنت وحدك للدمع ماش
يغالي ايام شهر العسل مرات
جن مو بالعسل جنهن بلنعاش
وعليه تكول خاين ونه الوافيت
كلمة بيا بخت تحجيهه وتروح
اضحك أي ولكن ضحكتي شلون؟
من الالم اضحك طير مذبوح
اشوفك ما اشوفه من احاجيه
ويفز كلبي ويريد ابشوكنه ايبوح
ويزل لساني بسمك وارتبك بي
وارد اسمك وتطلع شايغة الروح
يا عيشة العشتهه ويا عرس هاذ
وحلمي اوياك بالتابوت مطروح
تحط ابين عينك الله يا ريت
وملح لتحط ابشفة جرح مفتوح
ب اول ليلة ما ردتك عله البال
كلت قسمة ونصيب اشينفع النوح
ردت انساك بس شلون انساك
وعطرك وي ضجيج المستحة ايفوح
يوزعون ابتسامات اليعرسون
ونه نظرات عيني اتوزع اجروح
علي محسوب ادرى الذنب ذنبين
فلتزيد المواجع بيه لتزيد
خطية الكاع من تشتاك للماي
بوجه الكاع تطلعلك تجاعيد
ينوح البلبل البلعرس مسجون
وعله نوحة الغشيم ايكول تغريد
تره الفاكد عزيز ابوحشة الليل
حته العيد اذا مر يذبحة العيد
اخجل من يمر طاريك عالروح
لان اليمي غيرك وانت البعيد
ولان البلحضن غير الي بالبال
يعني امن الصعوبة يصير النريد
شوصف عرسي جيب ابساعة العوز
نفز اثنينه وي مدة الايد
ودي
