مستاحش

[ابو مناف البصري]

مستاحش
تمر بيّه السچچ سكتة .. وأرد مذبوح
لن طولك بعد مامش
ولك عمري عطش .. عمري مهر مجنون
ولك عمري تعنالك، يهلبت چلمة بيك تهون
آني الطحت بدروبك مذلّة .. وهَم
أفر گلبي بسواليفك واطيحن دمّ
وانتَ مسيّس بكل السواجي ورود
وانتَ مسيّس بكل الگلوب ورود
وبروحي تمر جدحة نجم للگاع
تجرحني ولا عوفك
و اخافن تثگل عيوني من اشوفك
و اطيح بروحي من تجزي حطب والهب ..
وانتَ ولا تخضّر عود
ولك خضّر ولو بس ماي
أجيك مناحر السچة، والحچي مترّب عله عيوني
و أصابيعي دمع .. و امشيلك مراية
أجيك بحيل فختاية وأرد عشگ ما ينگال
واطگ بعيونك المغرب .. شذر و هلال
ياخذني عليك الليل .. يلطولك سمه .. وهلال
أگعد بدربك سمه .. وانتَ اكبر بعمري گمر
آني المبعثر سواجي، و انتَ ها وسعك نهر
آني بيّه السكتة تمشي سنين
تعبان النهر بالماي
ثگلان النهر بالطين
والسكتة جسر ع الماي، روحي لياجرف تردين
يا هلبت تجي بلا خوف
زاهي الشوف بعيونك .. واحچيلك عليّ الليل كلّه
وترجف بروحي محنّة
غنّه حتى الخوف، بيّه الماي غنّه
وفاضت بروحي المحنّة
واعتنيت الشوگ بيّه وما خفت ..
خافت عيونك عليّ وما خفت
طشريت أيامي، دوهنّي غرامك حيل
وبروحي تهت
وانت كلش مستريح، وآني من شفتك همت
آني من شفتك شبابيچ العمر وجّن ضوه وقداح
وأيامي رصيف يروح للملگه .. ويرد مرتاح
والبيت اليخضّرلك على العتبة عشب أخضر
و أظل آني على الشوفات .. خلگ يزغر
خلگ يكبر
وتظل انتَ على أيامي حرير اشگر

- علي الشباني

 

[شَمَّـمْ🤍]

اختيارٌ مميز ..
سلمت يداك ،

 

[Retaj Al-Hassan]

عآآشـت آلآيآدي

يسـلمـووو ع آلنقل