منايانه غفل والدنية غدارة

[رمااد اانسان]

منايانه غفل والدنية غدارة
وفواتحنة أكثرت والدمع يتجارة
وشارتنا الكبل .. جانت مثل للناس
هسه احنه النخاف اتلوحنه الشارة
جنه اعله المنايا انفوت متعنين
وعله زمور التفك لو ثار نتباره
وجان المشتهينه اندك عليه الباب
ونخلي اعلى راسه الفشك كبارة
وجان الموت يصفن من علينه ايفوت
ومن نصرخ ابوجهه ايبدل افكاره
شعب جان اليمسه ايموت كبل الموت
وعلى هاي الشمايل كبرت زغاره
نمشي ابطولنا وبالفخر متحزمين
ويسورب ورانه التكثر اعذاره
صفينه انشاكف الطك بالاسف والحيف
وندور عالبخيت انلوذ بكتارة
ياموت العفه ارحمني برصاصة موت
ولاعيشن دجاجة بيت دواره
سلام ابايسكله ايدور الولايات
ولا يمشن وراه خمسين سياره
وابو كريم نصير وشعل كردستان
وظلت كل رفاقه اتسولف اخباره
وحسن نايب عريف وغير التاريخ
وثاير ماتحمه ابنار ثواره
وابو محيسن ترف ويخوض ماي الهور
وبدمه الكصب يتعالن اكصاره
ياشعب الفواتح ياطريق الموت
ايمام الما يعور يستحي الزاره
ياشعب الضحايا ... امجتفين اجتاف
نتنطر سرانه يحين مشواره
شني فود النخل لو طال بيه الطول
والارض الخبيثة اتحوش جماره
يبن صالح وحكك.. وحك دم سعدون
وحك ثارك الطاح وما طفت ناره
وحك ضحكة اعيونك والدعابة البيك
ردتك ساعة الطك تنجوي بناره
بس يافشلتي ويا فشلة الحبوك
( جتل خنزير محد ياخذ ابثاره)
المرحوم الشاعر
عريان السيد خلف

 

[mohammed.shams]

شكرا للجهود المبذولة

 

[جنون العاطفه]

الله الله
يسلمووو لإنتقائك الرائع
عاش النقل روعاات
وردي

 

[حفيده حمورابي]

ذوووق

 

[رمااد اانسان]

ذوووق

الذوق احساسك والجميل والراقي حضوركِ
نورتي يسلموووووو على التواصل

 

[قيصر الحب]

ابدااااع راقي..
وفي منتهى الروعه والجمااال
كلمااااااااات من ذهب..
ومعطرة بعطور ساحرة..
لاعدمنا كل مايخطه قلمك لنا
تحياتي وعبير ودي