منو ماكل "توله"

[ابو مناف البصري]

منو ماكل "توله"
الله يرحمك شاعرنا عطا خميس السعيدي الله يرحمه

الاعور كله اعور مو كريم العين
وابو الجنيب گله بمشيتك لوله
وحط اذنك وميز نعم كلها أصوات
اكو عفطة عنز وهناك هلهوله
وفرق بين الخطيب وصيحت الدلال
وفرق مابين عدله وبين معدوله
علامك ياوطن كثرة عليك الفوس
هدما بالمعاول بيك معموله
ياهو الوهمك بالغنم يسرح ذيب
وليش انطيت صوفك غير غازوله
شجاك وبعت سرك وانت سرك بير
ومغطى بطلاسم محد ينوله
ضاع القفل منك لونسيت الباب
وخليت الحرامي يطبلك بطوله
بيتك خزنت الله وفاتح البيبان
وغيرك كلشي ماكو وبوبه مقفوله
يارعي النفط راح النفط نهبوه
والزئبق الأحمر كنسو حقوله
وعلى الاحوط وجوبا بعد مانهبوه
ركعتين بشرع زلماي صلوله
وردينه نتگاود بس انا وچلوب
نرگض على المامش والعشا توله