ح
يا هلا ومية هلا بالأخ العزيز مصطفى ومنور المتصفح بوجودك الطيب بهاي الاستضافة الحلوة اللي رتبتها إلنا الأخت الفاضلة ماسه
كلش يسعدني أكون وياكم اليوم و حبيت أشاركك بـ 5 أسئلة من القلب حتى نسولف بجوهرك النقي
السؤال الاول بهالوكت هواي ناس تغيرت ورا الشاشات شنو الشي اللي كلش حرصت ما تخسره أو تغيره بشخصيتك الحقيقية من دخلت لعالم المنتديات
السؤال الثاني كلنا نمر بمحطات تغير تفكيرنا شنو أصعب درس أو موقف مريت بيه ورغم أذيته اليوم تكول الحمد لله لأنه صنع من عندك مصطفى الواعي والناضج اللي نشوفه هسة
السؤال الثالث المواقف الصعبة هي اللي تبين مَعدن البشر وتكشف السند الحقيقي بمسيرة حياتك منو الشخص اللي من تضيك بيك الدنيا تلتجأ إله وأنت مغمض وعينك باردة
السؤال الرابع عوفنا من الرتب والمشاركات بالمنتدى، شنو الأثر الإنساني أو الذكرى الحلوة اللي تتمنى الناس تذكرك بيها حتى لو غبت عنهم فد يوم
السؤال الخامس كل واحد بينا عنده حلم أو هدف يسعى وراه شنو الشغف اللي من تفكر بيه ينطيك طاقة وحيل حتى تبدي يومك بكل تفاؤل وإصرار
وأتمنالك استضافة ممتعة وموفقة يا أخويا العزيز
وكل الشكر للأخت ماسه وأعتذر منكم جميعاً إذا قصرت بالتواجد أو اختصرت الأسئلة لكوني مشغول بالعمل تحياتي للجميع
حيالك اللّٰــه تاج راسي حَــبيبي
يا هلا بيك يا الغالي والهلا بوجودك اللي يفتح النفس
1 شنو الشي اللي كلش حرصت ما تخسره او تغيره بشخصيتك الحقيقية
الحراسة الاكبر جانت على وحشة الصدق وقسوة الحقيقة بهالزمن اللي الناس تركض وراء التصفيق والشاشات والقبول المزيف انا حرصت ما ابيع صوتي الحقيقي حتى ارضي المجموع الاقفاص سهلة وكلش متوفرة بس الانسان من يفقد جرأته ويكون شفاف لدرجة التعري كدام نفسه يموت من الداخل وهو بعده يمشي على رجليه حرصت ابقى مثل ما اني بكل عقدي ووضوحي القاسي ما اتلون حتى احصل على لايك او كلمة اعجاب من احد
2 اصعب درس او موقف مريت بيه ورغم اذيته اليوم تكول الحمد لله
اصعب درس هو لحظة اليقين بان لا احد يأتي لينقذك من توقف بوحدك على حافة الهاوية وتكتشف ان كل الاكتاف اللي ظنيتها سند هي مجرد اوهام مؤقتة ويبقى وجهك بوجه الظلمة والعدم الاذية بالبداية جانت تحرق الروح بس اليوم اكول الحمد لله الف مرة لان هذا السقوط المروع هو اللي هشم كل نسخنا القديمة الطفولية وطلع من عدنا هذا الانسان الصلب الناضج اللي يعرف شلون يلم شتات روحه بروحه بدون ما يمد ايده لأحد
3 منو الشخص اللي من تضيك بيك الدنيا تلتجأ اليه وانت مغمض
العمق الحقيقي يكولك ماكو احد الانسان بهالدنيا يطبها وحدها ويطلع منها وحدها بالمواقف الكبيرة من تشتد وتضيق النفس حتى الاقرباء يصيرون بعاد والكلمات تفقد معناها الواحد من يغمض عينه بليل طويل ما يلگه غير ذاته المنهكة يعانقها ويقعد يسولف وياها السند الحقيقي مو شخص خارجي هو هاي القدرة السرية على احتواء الوجع بصمت وبدون ما تشكيه لاحد
4 شنو الاثر الانساني او الذكرى الحلوة اللي تتمنى الناس تذكرك بيها
الرتب تروح والكلمات تنمحي والاسامي تنسى بندرة الوقت اتمنى الناس من يمر طاريي ما يذكرون فلان الشاطر او فلان المثقف لا اتمنى يكولون هذا جان انسان حقيقي ما خان روحه ودخل لدنيا الناس وتركها نظيفة بلا اذى وعاش شجاع بما يكفي ليكون نفسه الذكرى الاعمق هي ان تترك خلفك اثر طيف دافي او فكرة تضيء عتمة شخص تائه
5 شنو الشغف اللي من تفكر بيه ينطيك طاقة وحيل حتى تبدي يومك
الشغف مو تفاؤل اعمي ولا طاقة ايجابية تجارية الشغف عندي هو مكابدة العدم ان تدري ان الحياة عبثية وقصيرة ومع ذلك تصر ان تترك نقش ان تكتب سطر يخلد معنى او تدافع عن فكرة تؤمن بيها وسط كل هذا الخراب الشغف هو هذا الصراع المستمر حتى ما تخلي الايام الباهتة تبلع روحك من افكر ان عندي فكرة لازم تطلع للنور او حرف لازم ينكتب بصدق احس نفسي ملزم اصحى واواجه النهار بكل ثقله
ممتن منك
نبضاً ووداً.
━━━━━━━━━━
: يلامس عمق فكره وقلمه.
: (بيت شعر يهديه لكم، كتاب أثّر في حياته 
، أو نصيحة قصيرة من قلبه 
).
.
