(( من هديل شاعرنا الكبير مظفر النواب ))
فاركَيت انت السفينة وآنه جايب لك بحر
خفت عشكَـ الناس ما يكفيك توصل فرح كَلبك
كعديت الثلج من نومه الثجيل
سبلت لك فرح كَلبي سلسبيل
جبت طوفان ولكَيتك .. جنك انت مسحت نفسك
يا وسافة ..
خفت نحلم بيك مليت السفينة والسفر
شلون كَلبك طاوعك تغفى على إسكان
واحنه بموج حيتان وكواسج
والفوانيس انطفت والدنيا ظلمة بلا كَمر
والبحر اسمه بحر ..
ما بجيتك .. آنه بجتني السفينة
شلون ما طش الرذاذ تريد تبحر
تدري نوبات السفن لو ضاق خاطرها بجبن قبطانها تسيس وحدها
تدري نوبات المحبة للقهر
ما بجيتك ..
ما ادري منهو بصدري يبجي
مدري منهو يشكَكَـ بكَلبي الكواغد
مدري منهو يريد يسافر
مدري منهو يريد يجرني بيدر للمطر
والمطر نوبات ماهواش يا حبيب مطر
ما بجيتك .. درت عيني للبحر
ابجي المسافات لهمتها وياك
تجذب .. انت تجذب ما بجيتك
جزت منك والسفينة
وروحي كلها سيستها .. تيهتها
ولك واللـه تيهتها
شكبن رياح وبواجي
كَلي شانطر آنه عندك وانت خاروعة سبخ؟
كَلي شانطر بالسبخ؟
كَلي يا رب البحر شنهي اللي لمك ع الوسخ؟
كَبل حبيتك ولا حبيت مثلك
كَبل كل الناس كَتلك
لا تذلني بعشرتك .. واللـه اكرهك
أنه يا ابن آدم بشر
ما بجيتك .. ما بجيتك
آنه جايب لك من دموعي بحر