الشوگ سولة

[آهات حالمه]

الشوگ سولة

يالفگدك نخر عظمي
والوذن بيك من الناس

يــ سليمان روحي
تعال براسي چم هدهد
يشكي وماتفهمه الناس
تعال استفحل الوهواس

ابعده شلون .. گطعك
ذاك اليكفر بروحي
و وصلك يجبر ضلوعي
واشواگك حوافر خيل !
و مبسمك جازي الفرح
و انه الدخان يشربني
بتوالي الليل

يما تدري عفت بيه
حزن وعيون تنشغ من يمر طرواك
چنت عايش عله عيونك
ومتت جفاك

يالتخفگ حدر ضلعي
الحگ عيرتني الناس
ونياشينك كلت گلبي
وانت هناك
غاد من التعب وجهك يحايلني
و احنلك واجيك من التعب چله
وگبل لاتدفه اشواگي تزاعلني !!

الحزن مرني !
حزن ..
كلما اريد افرح يفززني
حزن ..
من دون كل ايتام الولاية
ونياشين الرصيف التطبع بخدهم
يميزني !
حزن مامر مثل حزني

يالبيك التعب ينزاح
يالبيك العطش يروه
اعطشلك ترافة ماي
وانت عليك تصلبني

مر چانون ..
حزنك يچوي بضلوعي ويعطبني
نطرتك والضمير يلوب
چا چم دوب ؟
انثر كل ضوه بروحي عله سنينك
انه ماعذبوني الناس
العذبتني نياشينك

اطش عمري !
اطش گلبي ..
كواغد ! ، لدروبك لمن تجبل
وادفيك بغنه السبعين
خافنها الضلوع تصل
واحرگ كل بگايه الروح
تضويلك ..
واخضرلك ضوه لباچر
انه ارهملك وطن واحباب
بس انت هويتك تقره المهاجر

وانه ماي ..
ولو نشف يذبل خضارك
والعيون ، التهوه لونك
يذبل بضيهن ، سمارك
تطفه شمعات المواعيد ،
التدلك لو مشيت
وادور كل شوغات روحي
عثرة .. بيك شما خطيت

يصير عذرك بالمحطة بلا ذنب
كلشي عندك هان
بعد مادلل و احن

وخاف الك نيه
من اعووف ترد تحن
وتفزز جروحي القديمة
وتصوغ من بچيك مزن
چلمة الك ! ذمة عليه
( ماترجعني الاغاني )
لا تتاني ..








حمزة آل جبور

 

[الرااااكد]

نقل جميل اخت
آهات حالمه
سلمت بداك
لاخلا ولاعدم