احن لطفلتي هاي الخذت روحي
جنني عشكَـ هاي الحراميه
ما اعرف عشكَها شكثر بالروح
بس كل الأعرفه ميه بالميه
هاي الطفلة باكَت كلشي والله
وبكل البراءة تكَول شعليه
لو غابت أعيش الحزن والآآه
وتمر بيه بشجن أزمات نفسية
ولو تقبل عليه مدري شيصير
أحس الدنيا كلهه تصير ورديه
وأعاملها بقساوة وعود زعلان
وأدير الوجه عنها بكل فدائية
وأجاهد كلش وما احضن بساع
وانا المشتاكَـ الهه بصورة ناريه
واكَول ابقي بغيابج من تغيبين
عادي لو غيابج صار يوميه
واتظاهر بعد ما همني الابعاد
وأكَول الحُب صبح لحظات وقتيه
بس المشكلة ما تصبر اهواي
وبنص الحضن الكَاها مرميه
تكَلي يا حبيبي شبيك زعلان
هم تزعل عليّ وما تحن ليه؟
انا بكل الليالي الك اشتاكَـ
وبهذا الحضن أحلامي ليليه
وأرجع وابتسم وتاخذني الضحكات
وانسى اللوم كله وانسى طاريه
وانساه التظاهر وانسى الاعتاب
وأحضنها بعشكَـ احضان ثورية
ما اخلي وجه لا شفه لا وجنات
يعني المختصر ما ينحجي البيه
بس كل الاعرفه وهي وياي
من حُبهه تظل أفكاري عذريه
ومعذور بكلامي اول الابيات
مجنون بعشكَـ هاي الحراميه
......
بقلمي
