حرامية ايام زمان

[رمااد اانسان]

حبوبتي تگول يحبوبه بعد لاتحچي عالحراميه يحبوبه الحراميه أكثرهم خوش زلم وعدهم غيره ولايبوگون من ديرتهم ولايبوگون بيت الأرمله ولا يبوگون البيت الياكلون بيه...
گتلها حبوبه اني شو ماصدك بهذا الحچي ..
گالت يحبوبه إسمع هاي السالفه.. گتلها سولفي..
گالت يحبوبه ذيچ السنه عدنه فليسات ظامهن جدك بصندگچه وحاط وياهن ورقه كتبها الشيخ مكتوب بيها اللهم احفظهن من الحراميه واولاد الحرام...
تگول يوم من الايام گعدنه الصبح لگينه الصندگچه مبيوگه هي والفلوس..
ظلينه نتلاوم أني وجدك ولانگدر نسولف للوادم فشله..
تگول يحبوبه الضحه ولن زلمه ينده على جدك ومدري شحاط تحت عباته تگول تلگاه جدك وگعد الرجال وشرب ماي شال عباته ولن الصندگچه مالتنه..
گال لجدك عمي هذا حلالك والله بدالك ماخذنه شي منهن..
تگول يحبوبه جدك بهت وأخذله شويه بلع ريجه وگاله عمي ليش رديتهن واني لاعرفك ولاتعرفني
گاله الحرامي يعمي لكيت وياهن ورقه مكتوب بيها اللهم احفظهن من الحراميه واولاد الحرام
وإحنا ماريد تهتز ثقتك بالله وإنت مأمن بيه
وثانيا إحنا صحيح حراميه بس مو اولاد حرام...
گتلها حبوبه اني مصدك بيچ بس يحبوبه اشو حراميتنه هسه يصومون ويصلون ويسولفون بمالات الله وأهل البيت ليش... جرتلها حسره حبوبتي ونفس جگاره طويل وگالت يحبوبه هذا الوكت مو مثل ذاك الوكت...
گوم عني اريد أنام
وتعيشون وتسلمون

 

[Retaj Al-Hassan]

عآآشـت آلآيآدي

يسـلمـووو ع آلنقل