قبل يومين كنت مع بعض الأصدقاء نتعشى بمنطقة الاعظمية
احب المطاعم ذات المستوى المتوسط لا شعبية جداً ولا فخمة جداً
لان الاكل بيها يكون طيب والكعدة جيدة
احد عمال المطعم كان خلوق وخدوم جداً وبعد ما كملنا الأكل طلبنا الجاي
وسالته بالاستكان ؟ اعتذر وكال لا بس دسبوزبول
فرفضت الجاي وشربو الباقين
المهم هذا الشاب كال ولا يهمك وراح لمطعم بعيد نسبياً وطلب منهم استكان وقدملي الجاي
وبدون ما اطلب منه أن يروح ويكلف نفسه رغم لاحظت رجلة مصابه والمشي صعب عليه
المهم اني كرمته للولد ولانه الاكرامية كانت اكثر مما يتوقع الأصدقاء فكالو شدعوة هلكد تنطيه
وهنا كلت لأن مو دائماً نلكه ناس متواضعين سهل التعامل وياهم
مو دائماً نلكه اشخاص خدومين دون مصلحة
مو دائماً تلكه ناس تضحك بوجهك وصادقين وياك ويقدمون خدمة بدون اي هدف وما مجبرين عليها
لهذا حبيت ابين لهذا العامل المحترم انه هذا النوع من الاخلاق يستحق التقدير
ومن تركنا المطعم عبرتله عن احترامي الكبير وشفت السعادة والرضا بعيونه
يجب أن يوصل طريق المعروف لا أن يقطع ..