بما إنا على ابواب شهر مبارك شهر رمضان
قصيدة من كم سنة كتبها عن ايام شهر رمضان
في طفولتي..
أوف يا شهگة الغروب
تتلاگة ارواحنه بصوت الوذان
وگبل كل ولد المحلة
انطر حته لو نسمه منها تمرني
وتلملمنه بذيج طيبتنه والوكاحه
ولعبنه ابابكم بيت ابيتات
ونامت امي على صوت الجاي
وتلملنه بسوالف عمر نحجيها
الله يعمرنه النگضة وما دريناها
زعلت ام احمد علينه
وراحت امي تراضيها
وخذت وياها
نسوان المحلة
وصاحت بينه
بطلوا سوالفكم زعلت ام احمد
ظلينه نخاف انمر عله بابهم
أخاف احمد يعاركنه
واحنه ازغار
نلعب بيت ابيتات
واجتنه ساعة الغروب
وصاح الوذان الله اكبر
وفضى شارعنه من الحبايب
وصارت الوحشة تتختل بين البيوت
وشوية وتوزعت المواعين
من جار لجار
حلاوة لوشعثت تمر خستاوي
لو حفنة اللگيمات
واشم عطر الجفافي والورود
وردينه على بابكم نلعب
بيت ابيتات
وجن امي لمت حبايبه والجيران
وظلت تسولف وبديها الفناجين
وام احمد ردت وبديها ظبة ابخور
والمسج والعنبر ظم روحه بعبايته
وتلگتها النسوان
وعينهم علينه
خافو منه على البنات
واحنه ازغار
مانعرف بس لعبة بيت ابيتات
وبنيه اسمها (....... ) ماتلعب اويانه
بس تمر من يمي يرتجف گلبي
واصيح ابصوت ما ينسمع
لعبي ويانه مثل البنات
تگعد ويه النسوان وعيني عليها
ومابطلت بس اعاين بلجن تحن
وتلعب اويانه
ازغير انه واحب عشگ البنات
ومرمرني هواها
وگلت كون رمضان الدهر يبقه
وتظل لمت النسوان
وماتموت لعبتنه
وظليت بس وي روحي احجي
وفززني صوت امي
يمه اگعد بسك حلم
وبسك تسولف بالبنات
عقيل العراقي
التعديل الأخير بواسطة المشرف:
