سوالفنـا عراقيـة .

[مـــجيـّدالسيــــد]

لقح حبيبي
تره الاوكسجين من ينزل جوه ال ٥٠ تبدي تشوف منكر ونكير بالدشاديش

 

[ذوق]

-


أبسط المواقف ممكن تسعدك ..
الكلمات البسيطة اللي تنگال ع عجَلَ وبكل دفء ،
الضحكات اللي تزيد وياهم ،
دگات گلبك الـ تسمعهآ بـ إذنك "
ذولي ، الاشخاص
اللي يحولون يومك من يوم سيء
الى شي ما مُمكن توصفه من الراحة والامان !
شي بس انت تحسه بروحك '


ودّ چبير الكُم


ً

 

[وهج الحروف🔥]

حتى السوالف السطحيه
تعجبك

اذا كان اليسولف تحبه .

 

[ذوق]

-

حُب چبير للي يفهَم حاجتنا للعزلةة ،
حُب چبير للي مَ يسألنا شبيكم
لأن يعرفنا مَ نحچي ،
حُب چبير للي يواسينا بـ أغنية تعبر عنا
حُب چبير للأغاني
و الاشعار الـ تحچي واقِعنا نيابةً عنا
للـ يوگفون ويانا من بعيد ،
و ، مَ يحسّسونا بـ وگفتهم مَنيّة علينا ..!
حُب چبير للـ يعرُفنا ،
و أكبر للـ مَ يعرفنا ، ويدعيلنا

 

[وهج الحروف🔥]

اذكر من كنت صبي دون ال 15
كنت اقرا هواي غير الكتب المدرسيه.. وبصراحه هالشي انعكس عليه بحياتي، لان كمت من احجي ويا اهلي اتفستق بدون قصد ، كوله شبيه بالفصيح
لان كثرة القراءه استولت على عقلي الباطن....
المهم
مره اخوي الكبير يحجي وياي
ورأسا سكتت
كال شبيك ...متحجي

كتله مو اني من اتكلم
الزم عنان فرس كلامي

طكها ضحكه وكال اوكف عمي
سويتها حصونه وعنان
متكلي شنو قصتك !!
ههههه

 

[النبيل]

ادخل تويتر الكه طلابه فائق اطلع وادخل انستا الكه شهد وسالفتها
وين اولي الخاطر محمد شهل قرف

 

[مـــجيـّدالسيــــد]

انا من اطباعي امزح كثيرا في العمل
مع الجميع فد يوم اجه طبيب نقل علينه
من غير مستشفى كنت في حينها عندما
أتحدث مع اي شخص أقول بعد الكلام
كلمة وجدي اي احلف باسم جدي هذا
الطبيب الجديد بعد شهر صار صديق
مقرب فقال لي مجيد انت من اي سادة
فقلت له انا ليس سيد انا رجال بهادلي
قال اذا بهادلي ليش تكول وجدي هههه
طبعا بالعراق اللي يكول وجدي يعني
سيد من سلالة الرسول(ص) أو الامام علي
عليه السلام المهم رديت عليه قلت له
انا احلف بجدي واسمه سيد وليس نسبه
سيد انا ماكايل وجدي رسول الله ههههه
انا احلف بجدي انتم شلكم علاقة بيه

كال هاي هي حتى احنه بعد نحلف بجدك
ههههه

 

[وهج الحروف🔥]

اذكر مره بعملي مسوؤل قسم
طلبني المدير وكانت شركه بلغاريه متعاقدين وياها

المهم
دخلت سلمت ع الموجودين
قسم افنديه وقسم لابسين عكال
وواحد احمر اشكر ، كلت بكلبي هذا بلغاري
كالولي الكاعدين
الله بالخير
كتلهم الله بالخير اغاتي
بس هذا الاشكر ماكلي الله بالخير

فحبيت الطف جو شويه
التفتت على هذا الاشكر
كتله علواااان ، فنك تكلي الله بالخير
وجان يرد عليه
الله بالخير عيني

اني انصدمت هههههههه
طلع عراقي
وشصار بيه وقتها
ياااه عركت كصتي وكمت ابلعم من الاحراج .

 

[وهج الحروف🔥]

ابو المثل يكول

الحكوك تريد حلوك

زين خطيه الخرسان شلون يطلع حقهم !!!

 

[ذوق]

-

جيل الـ 90 و الألفينات ..!

يوم عن يوم ،
دنكبَر ركض ،
مثل الظّل من يتمدّد ع الحايط ..!
واحدنا تارِس شعرَه البياض ،!
بـ حيث ، من أگعد و أصفُن ويّا نفسي ..
طُفولتي شنو بيها شي حلو ..!؟
و شنو شفنا من حياتنا ..؟
وشنو قدّمنا ..!
اصلاً ملتهين بالقيل و القال لا أكثر ><

- من يسولفون أهلنا عن ماضيهُم ،
تشوفه ماضي حلو كُله وِنسة و خالي من النّفاق و ... إلخ ،
چانوا عفوييّن زايد عن اللّزوم ..
في حين ، جيلنا خالي من العفويّة
او بالأحرى موجودة بـ نسبة بسيطة جدّاً ..!!


ً