هذا واحد يسولف
ييقول
نهاية بالسبعينات من جنه كاعدين بابو الخصيب
جان اكو نهر صغيرون يمر بمنطقتنه اسمه نهر مهيجران
بهل الفتره انه نجحت من المتوسطه للاعدادبه
وجانت هدية النجاح بايسكل هيرو اسود ،
جنت أفيك بيه كدام جهال المنطقه وما بقيت مكان ما رحت بيه ،،
يوم من الايام اخذني البايسكل يم نهر مهيجران
وعلى كد ماجنت مولع بالافلام الهنديه ،
اتذكرت مشهد راجي كابور من جان صاعد بدراجته
ولحكوه جماعة جبار سنك وشلون حصروه كدام النهر ،
وشلون اجـــه بكل سرعته وطـــار وطفر النهر
تخيلت المنظر وتخيلت شلون راجي كابور عبر النهر ،
بيني وبين نفسي كلت راجي كابور مو احسن مني ،
ولازم اطفر مهيجران لو مطي يركب مطي ..
وبلحظة صمت اخذت القرار ..
وجماعتي ولد المنطقه كالولي وك عويمر انت صدك تحجي النهر عريض
وين تكدر تطفره بزرورك هذي كل وحده شمتنها،، ،،،
كتلهم باجر الصبح الكل يجمع هنا وراح تشوفون طفرتي شلونها وراح يذكرني التاريخ
،،،
ثاني يوم اجيت ،
اكو منطقه بالنهر الحواف تصير قريبه من بعض ،،
جان اوكف من مسافه بعيده جريت نفس و انطلقت بكل سرعتي ،،،
وجان اطفر وانزل كبل بنص النهر وغطيت وهيه غطه
هلدوره انه متين وما اعرف اسبح زين ،،
الجهال كامت تصيح غرك عويمر غرك عويمر
جان الشباب كلها تجيت بالنهر وبالكوه طلعوني ،،
أبوي اول ما تلكاني كظني من يأختي
بإيده اليسره وكلي عاشت ايدك وليدي ،
تريد تعبر النهر بهذا كرشك موووو ،
وحاط ايده اليمنه وره ظهره وكامش الصونده ،،
شوداك للنهر مشتريلك باسكل بالدين خاطر تعبر نهر شيب موتاك ،،
اليوم اكطع الصونده عل ظهرك
وجان يلزمني ووين ما يوجعني،
ابن النعل صاير راجي كابور تريد تعبر النهر ،
كلب ابن الكلب بأسكل جديد،
انه اعلمك ،،
اليوم اطلع القضى والمضى بيك ،،
وياريت على هاي وفضت ..،،
كل مايضوج ويتعارك ويه امي يدز عليه ويكولي ابن الكلب انت شوداك لمهيجران ويرجع يورمني من الكتل ..
من ذاك اليوم لهذا اليوم .. ما تكربت من النهر
