أعجبتني قصيدة للشاعر أبي خديجة تقول:
ليش الناس ردت
وانته مارديت
او ليش الناس فرحت
وانه ما فرحيت
حنيت الجفوف
او زينيت البيت
او امن ايست
ومن الصبر مليت
كمت اتفكر الجفي ... وكلله
يجفي اعليمن اتحنيت ؟
واعدت الجهال او شعتذر منهم ؟
كلت الهم
اشبعكم شبع جكليت
كعدت اتنوع الدربك
او لمن جل الظلام
اعله الدرب تانيت
ونشدت كل اليمرون
او لو تدري اشكثر نشديت
او حرام امن النشد مليت
او تدري اشجم نذر نذريت ؟ !
ليش الناس ردت
وانت ما رديت ؟
غسلت الحنه من ايدي
او عوض عن الملبس
بس دمع نثريت
انخبط دمعي اويه كحل العين والحمرة
عسه لا حمرت خدي
ولا كحلة ابجفن خليت
ها .. يالكلت اوافي
اشعجب ما وافيت ؟!
اشلهاك اشعطلك عني ؟
تعال ابساع مانه اوداعتك سليت
يمعود ....يبو الغيره
شهرني الدمع بين الوادم اشهيره
حميتك رضت تترك ولفك ابحيره ؟
تره اسودت ابعيني
اخلافك الديره
تره دهري شمرني ابير .. ذبني
او سد حلك بيره
تره حملي ثجيل اوتعبت اجتافي
مو تدري الهجر جتال
بس امن الهجر يمعود او كافي
صدك جربة حنانك ذيج
بشت مايهه الصافي ؟!
صدك تاكل او تشرب
كايم اخلافي ؟
صدك جدمك مشه الغيري ؟
كبل كلبك يجيني امفرفح اوحافي
مو استاهدك كلما يمسك جوع
تركض تاكل اشفافي ؟
انه ابنيه وشوف الناس
كلمن وي حبيبه امشرغد او غافي
مر بيه ولو بالطيف
لفني ابحضك الدافي
خذتني وجنت طفله
اوعلمتني الشوك
وبكت كلبي يحايف مو حرام اتبوك ؟
او جنت لمن تغازلني
تكلي ابرمش عينج هالكلب مشبوك
او تتذكر لمن كتلي ...
وحكج ماكو بالنسوان بعيوني عداج اتلوك
او جنت من تصيح بسمي
اتصيحلي الغرنوك
لمن خليتني انجنيت
لمن خليتني .. ابحبك طرت ليفوك
او عفتني امعلكه ..او لا سنه ولا سنتين
بعد ما طوكتني ابطوك
جا ما كلت هاي اتموت ؟!
جا ما كلت بت او تستحي تطلع ولا سحكت رجلها ابسوك
مسجونه او على افراكك
وي ظيم الدهر مطبوك ؟
من كونك تحاججني
اشكثر تظهر عليك احلوك ؟
شتحمل بعد كلي ؟
وهو كلب الحديثة
ابظنتك طابوك ؟!