#سالفه ورباط
بالسبعينيات من چانت المدارس مختلطة بالصف الخامس الابتدائي جنت مصاحب وحدة أسمها داليا وچنت اعزها هواي وچانت داليا أحلى وأشطر وحدة بالصف وكانوا التلاميذ يحسدوني عليها لمجرد انها توگف وتسولف وياي وفد يوم دخلت الصف لگيت داليا تبچي سألتها شبيچ ؟ گالتلي نسيت كتاب الرياضيات مالتي وانت تعرف استاذ مطشر ابو الرياضيات ما يرحم ..
وبدون تردد طلعت الكتاب مالتي وگلتلها اخذيه وأنه اتصرف
وهي بدون تردد أخذت الكتاب مني وچانت فرحانه كلش حتى ما سألتني وانت شلون راح اتدبرها وي استاذ مطشر....
عفتها وگعدت برحلتي...
وبعد دقايق دخل أستاذ مطشر.. وچان بيومها عصبي كلش ..
وكالعادة اول ما دخل الصف وقبل مايگعد گال جملته الشهيرة
( اللي ماجايب الكتاب يطلع عالسبورة )
وبتردد وخوف شديد وگفت لوحدي ..
ولگيت الصف كله يباوع عليه ..
وقبل ما الأستاذ يتقرب مني..
لگيت ايمان ناولتني الكتاب مالتها وگامت وگفت بصفي عالسبورة .....
(هاي إيمان چانت راسبة من العام والتلاميذ يسمونها إيمان السكوتية ولا واحد من التلاميذ يتشاقه او يسولف وياها وهي اصلآ نادر ما تحچي وي واحد )
استاذ مطشر يگلي ولك شنو أنت ما جايب الكتاب مالتك ؟؟؟
گلتله اي استاذ ما جايبه....!!
گالي لعد هذا الكتاب مال منو ؟؟؟
ردت ايمان گالتله استاذ هذا الكتاب مالته ...!!
البارحة نساه يمي ...واليوم انه نسيت اجيب كتابي ...
وگامت وفتحت ايديها للمعلم استعداداً للعقوبة..
الأستاذ گالي اگعد أنت....
وكض العودة ونزل دگ فى إيمان المسكينة...
والصف كله يضحك عليها...
وأولهم داليا.... صاحبتي الجميلة الشاطرة ..
وكل عودة چانت لما تنزل على ايد إيمان چانت تنزل على گلبى وتذكرني شگد چنت غبي واثول ..
منبهر بداليا البنت الجميلة الشاطرة...
وما مأخذ بالي من إيمان اللي كلشي ما تسوي غير بس تنظرلي وتراقبني بصمت .!!!
#رباط سالفتي في المواقف والشدائد تكشف لك معادن الأصدقاء أو الأقارب....كم من صديق تنبهر بشكله أو مظهره أو أخلاقه وبعدها تكتشف بموقف صغير معه يعطيك الوجه الآخر أو بالعكس تجد صديق أو قريب منك غير مهتم به وهو يقف معك بدون مقابل ويتمنى لك كل الخير ......
أفكر في الي ناسيني وأنسى الي فاكرني
منقول.........
