رد: ~ماكو مني 2 ~
بتتذكروا اول يوم داومنا في بروضه ؟
أكيد كلكم بتتذكروا ! , أمك تلبس " منديل الصلاه " , "يانسه " وتستنى الباص معك ! إضل من السبعه ونص للثمانه وهي واقفه ع البرنده ليجي ! ؟
أول يوم نعيط و نعيط ! بدناش نروح ! وتيجي معنا !! واضل معنا لنروح !
وكل يوم الصبح توعدنا تيجي بعد الفرصه ! و ع الفاضي ما تيجي !
بس كل مره بنصدقها وكل مره ما بتيجي .
بتتذكروا ! انو كانت الدنيا برد الصبح ! وبعز المربعانيه ! و سكعتها بتقص المسمار , , أخوك نايم بلحافوا وابوك نايم ! وهي لحالها تقوم تلبسك وتستنى باص الروضه معك !
,
بتتذكروا لما كنا صف أول و ثاني وثالث ! , برضوا نفس الشي تقوم معنا من الصبح ! واضل تلبس فينا , تمشط شعرنا " صحيح كانت تقلعوا تقليع ! خاصه لما يكون متخربش ! " بس بعد ما نعيط ! تشمطنا بوسة و مصروف وسندويشة جبن!
بتتذكروا لما كانت تيجي تسأل عنا في المدرسه , كنا نروح نشوفها عشان تعطينا كمان مصروف !
واذا المعلمه قالتلها انو مش شاطرين !
اظل تبهدل فينا ! بس لما يجي أبونا تقلوا مناح ولادك بس بدهم شوية شد !!
.
ولما نغلبها ونسعدنها طول النهار ! واظل تقول بس يجي ابوكم إلا أقلوا , وأول ما يجي نفوت نعمل حالنا نايمين ! , ونتسمع شو بدها تقولوا ,
بس ما تقلوا !! ع الفاضي , ونرجع تاني يوم نسعدنها !
.
بتتذكروا
لما كنا نتمردغ بالتراب , وتقوم تزمنا وتحممنا وتضربنا ! وبعدها تمشطنا وتبوسنا وتعطينا مصروف ولا كأنوا في شي , وع الفاضي ثاني يوم نعيدها !!
,
بتتذكروا !
لما أول مره بلشت فيها تمشي أول خطوه ! , وتوقع ! وتصير تعيط !
بتفز وهي بتنط لتقيمك وبتصير تسب على حالها وتدعي على حالها !
وصوتها وخوفها ! بسمعوا اخوتنا في الهند !!
.
بتتذكروا
لما انجيب بسكوت عليت ! أو بسكوت الحجم العائلي ! وانت توكل وتخلص اول واحد ! ,وبعدين تعطيها هذيك النظرة " انو لسا بدك " وهي تعطيك يلي بإيدها ! ,, انت دايماً بتخلص بسرعه عشان توكل زياده , وهي دايماً بتوكل شوي شوي عشان تعطيك يلي حصتها !
.
.
بتتذكروا
لما تتطاوش مع ولاد وبنات الحارة ! ع الكورة ! وتاخذا منك وتخبي ! وانت تعيط ! بعدين تجيبك وتحبسك وتحكيلك إلعب فيه بالدار ! واذا بتخرج يا ويلك !!!
و ع الفاضي بتزم حالك وبتطلع برا ! .
.
بتتذكروا ! لما تطبخ طبخه بتحبهاش !
وتحرد عن الأكل ,
وتصيرتقلك يا بلاش !
بعدين بس تشوفك زعلت وقضيت النهار لحالك , بتقوم تعملك سفره مرتبه !
.
لما تمرض أو تيجيك سخونه خفيفه ! واضل تنفخ فيك أكل و دوا ! , لتفز حضرتك متل الناس!
و من بعدها , كل ما تشوفك ما افطرت أو خففت أوعيك ! وسهرت !
بتذكرك بالمرض وهسا بتمرض وهسا بتموت وهسا بتسخن !
.
.
ولسا بتووصل الجامعه وبتكبر , ونفس الشي , بتقوم معك الصبح ! وبتدعيلك !
واذا اتأخرت 5 دقائق عن البيت !
بتعمل بمخها فيلم هندي , أنك انخطفت ومنظمة ارهابيه خطفوك وباعوا اعضاءك !!
وبترن عليك خمسطعشر مره ! وبتكون على اعصابها وبدها تعيط
وبس ترد عليها بتبهدلك بهدله !! مرتبه !!
.
. الأم , هي الشخص الوحيد يلي بوقف على سجادة الصلاه وبدعي ربنا لكل يلي حوليه وبنسى يدعي إلو !
.
الأم عبارة عن معلم وممرضه وطباخ ! وددكتور ! ومصلح ألعاب ! وأحياناً حلاق ! بتصير شو ما بدك المهم تعملك يلي بدك اياه ! وتقضي حاجتك !
.
.
كل يوم وكل عام وكل عمر وأمهاتنا بكل خير
والله يرحم أمهات المسلمين
, ويربط على قلوب امهات الشهداء !
وكل ألأمهات , يلي ماخلفوا والله ما كتبلهم ولاد !
.كل عام وانتو بألف خير <3
<
<
مش عيد الأم , يوم عادي جداً , بس بمشاغل الحياه بين الدراسه والشغل والتعب والأرق يلي ما بتفضى فيه لتحك راسك !
مش غلط تدخل على امك وتبوس راسها ! وبإيدك ايشي بسيط
صدقني رح تفرح !
..
.
