مَرني الگحط
صـنت زرعـگ
و آنه بروحي مواسم جوع
وعطشت بساتين القوافي
وازغر حلم عندي أنباگ
وعله حيطان الاماني
بقت مذبوحة سوالفنه
**
مَرني الگحط
مرنيِ تلگهِ
ولايتي سميتها أنته
انه ولايتك
ليش مني اتشيل
وشكثر صب ناعور الجفه
وفضنه افراگ
وتسرفن درب الموادع
يعشگ صب مدامعنه
**
مَرني الگحط
انه وياك غيمهَ وگاع ؛
لاموعد يلمنه ولايطشنهَ وداع
تعال تسولفلك الشهگات
وحرورة اجروح امس
المشتاگ ما يلام يبنادم
تعال رد ذيج محاجينه
**
مَرني الگحط
فوگ إرموشي إطيوفَك عصافيّر !
ماأرمش اخاف إطيّوفَك اطير
والتمت فوگ الشفايف احجايات
مو سهلة الفاگدله ولف
يظل يتعثر بلا مشي
وتكتله الصفنات وذيج المحنه
**
مَرني الگحط
شيساگي العمر
لو عطشت سنينه لهواها
لو تلحگ لو يطشونه طش اهنود
ويسيس فوگ الماي صم ارماد
هاك اخذ ارويحتي واعگدها بطارف الگذلة
وبس أشمها اگولن تلاگينه
**
مَرني الگحط
مُرّني صوت ، إذني عطشانة لنبرتك
وأشتهيت اكتبلك قصيدة
نشفت ابحور الشعر
والشوگ حرگ ابيوته
وحدر افياي نهدك
نامت كل قوافينه..
**
مَرني الگحط
وشنهي لو يعتگ وجهنه إباب بيتك
مو خساره مگابلينك
يا احله هوه بريتي
وياشهگة فرح ماليه اسنيني
أريّدنك مثل ولاية !!
تلمني شمَا ضعَّت بيه
ونتلاگه شي يوم
حته لو ضيعنه
**
مَرني الگحط
ليش گاطع رزق
عيني وضال بعازة
ضحكتك
وذيج الشفايف التنگط عسل
يناعور التعب بسک تترسنه وتبدينه ؛
ولك بالعشرين ردنه نگوم ما عانتنه رجلينه
20/12/2020
العـ عقيل ـراقي
