أنا

[رامي النجفي]

اليوم شفت طفل صغير گتله شحاب تصير من تكبر ؟ گلي عندي امل اصير دكتور ، صفنت بجوابه لاحظت شيء ايجوز ما منتبهله قبل هذا الطفل لفت انتباهي اله ، فكرة الامل !
اذا نريد نفكر بشكل منطقي عقلاني راح نشوفها هي اعظم فكرة نشأة عليها البشرية ، دائما الطفل عنده امل ان يكبر و يحقق حلمه ، الشاب عنده امل ان يشتغل و يتزوج الي يحبها ، الاب عنده امل ان يطلعون اولاده احسن منه و يفرح بيهم ، الجد عنده امل يحس بدفئ المشاعر مع عائلته الكبيرة ، بكل المراحل العمرية راح نشوف المفهوم نفسه بس يتغير جزئياً حسب احتياجات المرحلة ، فكرة الامل هي اعظم فكرة ممكن تخليك تحب تعيش باچر ، دائما عدنا امل بعد كل عتمة يطلع ضوء وره كل ظُلم يجي عدل والا الحياة ما الها معنى للعيش

خلونا نتعلم دائما نزرع الامل بعقول اطفالنا ، الامل لوحدة يگدر يخلقلك جيل طموح ، جيل غالباً راح يكون افضل من جيلنا ، دائما نمي شعور الامل عند اطفالك لا تصير سوداوي خليه يعرف انه ماكو مستحيل ، حتى لو تشوف هل شيء صعب يصير ، بس خلي للطفل هامش من الامل و علمه شون يتمسك بي

و تذكر دائماً ان الله في السماء و الامل في الارض ، تفائل يا صديقي و ابحث عن سعادتك في اقرب الاشياء الك فـ احياناً تبحث عن نظارتك وهي على وجهك ....... تفائل و الله كريم ^____^

 

[رامي النجفي]

اكو اشخاص دائماً تشوفهم بالسوشيال ميديا ينشرون صور انه شادين مغذي و بالمستشفى و الناس تعلقلهم سلامات و طمنا وهل كلام او مثلا يفقدون شخص عزيز عليهم ويبقون نهار كله يدگون ويلطمون ، سابقاً چنت اگول خطية اني ماصاير بمكانهم وانطيهم عذر واكول الله يساعدهم ، بمرور الوقت صادفت هواي مشاكل و صارت عندي اكثر من حالة وفاة في عائلتي ، رغم هذا ما فد يوم نشرت شيء غير فقط موعد ومكان مجلس العزاء و خلص ، اشوف هذه المشاعر ميصير تطلع للعلن ، شنو الفائدة اذا احد شاف حزني و ضعفي ! شنو راح استفاد ؟ مستحيل احد راح يعرف مدى الالم في نفسي ، بالنهاية هاي مشاعر شخصية مايصير تنعرض لمن هب ودب ، اليوم هاي ظاهرة كلش انتشرت و صارت احسها شيء مبالغ بي ، يا اخي يعني راح تشفى اذا نشرت صورك لو راح تكسر قلوب الناس ! ارخص مرحلة ممكن يوصلها الانسان من يبلش يستجدي مشاعر الاخرين ، تره مو بس انت عندك مشاكل وتمر بظروف ، بهذا العالم كل انسان عنده مشاكله ، مو عبالك انت الوحيد الي گاعد تصير عليك مؤامرات كونية حتى يستهدفوك ، اكبر شويه و شغل عقلك و تعلم تصير انسان حقيقي


الكوميديان العظيم شارلي شابلن يگول
لديّ الكثير من المشاكل في حياتي ، لكن شفتاي لا تعرفان ذلك ، فهما دائما تبتسمان.

 

[رامي النجفي]

المرأة بين الماضي و الحاضر




المرأة حالُها حال كل الاشياء المتقلبة الي اخذتها رياح التغيير ، كل زمن عدى عليها ترك آثارهَ ، من عصر ابونا آدم لليوم ، مرت بحالات تهميش وحالات تمجيد واعتلت القمة في بعض الحضارات مثل البابلية و الفرعونية والاغريقية ، وصولاً للعصر الحديث بلشت النساء و هنا اقصد المجتمعات العربية ، بلشت تتصدر المشهد من جديد لكن مع الاسف تصدرته عبر التريند المُخجل ، صارن سلعة للتسويق او الجنس ، اليوم التيك توك و انستغرام مليان مقاطع رقص واظهار اجساد النساء ، اختلط مفهوم الحرية مع مفهوم الجراءة فـ انتجلنا اقبح شيء ممكن نشوفه و هو الابتذال ، بلشن بنات هذا الجيل يتخلون عن انوثتهن و عفتهن وحياءهم ، سابقاً من عظمة المرأة شبهها الرجل بـ الله تارة و اعتبرها هي الله في تارة آخرى ، لكن اليوم لو ردنا نشبه البنات يا ترى شلون راح نوصف حالتهم ؟ هذه دعوة للتفكر لكل بنت حابة تدخل او داخله لهذا المجال ، فكري يا صديقتي شنو راح تكون نظرتچ لنفسچ بعد 10 او 20 سنة !

يگول الروائي اليوناني نيكوس كازانتزاكيس في كتابه (تقرير الى غريكو) وهو يتحدث عن نفسه بعد ان تجنب المرأة لمدة 20 سنة كان يعتبر هذا العمل تقرباً لله حتى يرجع لربه طاهر من الدنس ، لكن بعد ان استضاف امراة في احد الايام الى غرفته : ابقيتها معي حتى الفجر ، دون ان اسمح لها بالذهاب ، يا اللهي أي متعة كانت و أي قيامة ، لقد كنت مصلوباً طوال حياتي ، وفي تلك الليلة و للمرة الاولى احسستُ بـ ان الله يقتربُ مني بذراعين مفتوحين و اي صلوات اديتها طوال ذلك الليل حتى طلوع الفجرِ ، و بأي كمال انفتح قلبي وسمح لله ان يدخل لـ أول مرة في حياتي ، آه لقد سبق لي وان قرأتُ ذلك في الكتاب المُقدس ......

 

[رامي النجفي]

قراءاتي الشخصية حول ايجاد نقطة الخلاف بين الديني و اللاديني




اعتقد جوهر الخلاف هو بمفهوم الحقيقة المُطلقة الي يتبناها الديني و الحقيقة النسبية الي يتبناها اللاديني ، فكرة الحقيقة بـ اعتقادي هي فلسفية اكثر من كونها منطقية ، لذلك اني اؤمن بالتبني الديني و اللاديني معاً ، خلي اوضح شنو قصدي ، اني اعتقد ان الحقائق المُطلقة نلگاها في القران و الرياضيات فقط اما غيرها حتى الاحاديث النبوية او العلوم الانسانية هي مجرد حقائق نسبية

اني اؤمن ان القران هو كتاب الله و كل كلمة بيه هي كلام الله شخصياً دون حذف او تحوير او تجويد ، لذلك هو حقيقة مُطلقة ، اما الرياضيات اجتمع عليها الطرفين انها غير قابله للنسبية ، 1+1=2 ماكو مجال نبقى نبحث و نشوف هل ممكن تصير 2.5 لو لا ، إذنْ الاجابة هنا حدية غير قابلة للجدل ، نجي لقضية الاحاديث النبوية او الروايات ، هل النبي او المعصوم هو الي كتبها في ايده ؟ لا طبعاً اكثرهن كُتبت بعد عشرات و حتى مئات السنين ، إذْنْ هنا نجي نعرض النص على الاساس الي هو القران ان كان يتناسب مع فكرة القران ممكن اخذ بيه ، اما اذا اكو اختلاف بسيط لو مو علم الرجال و مُسند ما اخذ بي لو تنگلب الدنيا ، ونفس هل قاعدة طبقها ع علوم الانسانية

بالمُلخص اريد اوضح فكرة انه ، تُجار الدين دائماً يريدوك تؤمن بالحقيقة المُطلقة في كل مفاصل الدين حتى بالتبعية راح تؤمن بقوامهم على الدين الى ان تصير تنطيهم قدسية آللهية دون ما تشعر ، اما اللادينيين يردون يفندون كل النظريات بعتبارها نسبية لكن قول علماء الرياضيات (بعتبارهم مايعترفون بالدين) ان الرياضيات بكل فروعها فيزياء وكيمياء كلها حقائق مُطلقة و مستحيل تگدر تغير بالمعادلات لو مهما سويت ماراح تنطيك نتيجة مُختلفة


واختم حديثي بـ اقتباسين حتى تمثل الطرفين واترك للقاريء حرية التحليل و الاستنتاج

علينا أن نوقظ أنفسنا على هذا الوعي الجديد الذي يمكننا من خلاله معرفة الحقيقة المطلقة ويمكننا أن نعرف تلك القوة الإلهية التي تحيط بنا . نيرمالا سريفاستافا

لا تكن وثنيًا أو ملتزمًا بأي عقيدة أو نظرية أو أيديولوجية ، حتى البوذية. كل أنظمة الفكر هي وسائل إرشادية وليست حقيقة مطلقة . نهات هانه

 

[رامي النجفي]

اني چنت دائماً اردد انه دم الشهداء اهم من الوطن وماكو شي يستاهل ننهي حياتنه من اجله ماكو شيء يستاهل قهر امك او زوجتك او اختك او بنتك ، قد يشوف شخص يعارضني بهل فكرة اني عديم الوطنية و ان الوطن يستاهل نضحيله ، لكن كنت ولازلت مقتنع ان الانسان هو الي شيد الاوطان و بنى الدول ، الوطن بدون انسان ماله قيمة مجرد تراب ، بس الانسان يعيش خارج وطنه بل حتى يعيش بدون دولة لان مفهوم الدولة هو فكرة طورها الانسان بلشها بالتجمعات السكانية ثم الحكم القبلي و تبلورت حديثاً فكرة الدولة ، قبل فترة قرأت لمحمد حسنين هيكل الصحفي المصري ذو الاتجاه الناصري ، بالرغم من اختلافي مع منهج هيكل بل حتى شخصيته المُتملقة و المُتقلبة لكن هل حدث كلش ينسجم مع رؤيتي هذه


حوار دار بينه وبين البرت انشتاين في سنة 1954 عندما زار الاخير في بيته يگول : هل تعلم يا هيكل ما هو اسوء اختراع انساني ندفع ثمنه لغاية اليوم ؟ انها فكرة الدولة فـ مع الدولة تقزم الانسان و تغولت الدولة ! .........

 

[رامي النجفي]

معقولة العراق يرجع لـ ايام الخير ؟




عندي ايمان مُطلق ان مُستقبل العراق راح يكون مُشرق ، هاي نظرتي مو فقط لأني شخص مُتفائل و انما الي يشوف تاريخ هذا البلد راح يكتشف شيء انه دائما التاريخ يُعيد نفسه ، بلش بالعصور القديمة كـ مجتمع بدائي جاهل بعدين صارت اكو افكار بلشت ترفع من المجتمع بعدين صارت اسس للحضارة مثل علماء ومفكرين و رجال دولة و وصل للقمة بالحضارات القديمة مابين النهرين ، ثم مر بفترة انكسار و تذبذب و بعدين دخل في فترة مُظلمة سادها الجهل و بعدها بلش يصعد المخطط البياني و بلش العراق يرجع و صار عاصمة الدولة العباسية و انتهت ع يد المغول و رجعنا لعصور الظلام و بعدين بلش العراق يتعافى في نهاية الدولة العثمانية و اصبح العراق اول دولة معترف بيها بعصبة الأمم بعد انهيار الدولة العثمانية و وصل لقمة مجده بالسبعينات و بعدين رجع الانحدار ، وحالياً احنه في اسوء فترة مُظلمة ، كارل ماركس يگول (التاريخ يُعيد نفسه في حالتين الاولى تراجيدية و في الثانية مهزلة) و لأني اشوف ماكو تراجيديا اكثر من الكوميديا الي نعيشيها من نشوف نفسنا عايشين بفقر و احنه نملك مليارات وماكو مهزلة اكبر من ان يحكمونا هيچ جهلة و هذوله الجهلة الأميين الي يحكمون اني اجزم انهم ما يعرفون تأريخ العراق لذلك تنطبق عليهن مقولة ماركس (الذي لا يعرف التأريخ محكوم عليه بتكراره) ، لهذا العراق راجع راجع لا محال مو اني الي اگول هيچ ، مكر التاريخ هو الي يأكد هل شيء

 

[رامي النجفي]

ليش الغرب تقدم بينما العرب تخلفوا ؟





سؤال مهم اكيد بيوم من الايام خطر ع بالك صديقي القاريء ، و اكيد صار عندك رأي اتجاه هل مسئلة ، بس اذا تسمحلي اقدملك وجهة نظر و فكر بيها ، الجواب هو الفرق بين التنوير في الغرب و الوعظ في الشرق ، مشكلة العرب انه دائما تجد شخص ينطيك فكرة معينة و يگلك نفذ ولا تناقش ، حتى وصلنا لمرحلة احنه اذا شفنا احد يناقش راح نسكته ! اعتادينا على هذا الوضع و صرنا نستهجن الي يعترض او يجي بفكرة جديدة ، دائما الواعظ العربي يرجعلك بمصادره للقران و يخليك بزاوية يگلك يلا اعترض ع كلام الله ! اذا استمريت بنقاشه راح يطلعك كافر و المجتمع ما يقبل الاساءة لمقدساته ، بينما الاديب و الفيلسوف و التنويري المصري طه حسين رحمه الله يگول (للقرآن و التوراة و الانجيل ان يقولوا لنا بأن هذه الكعبة بناها ابراهيم لعبادة الله و لكن النصوص الدينية هي نصوص ادبية وليست تأريخية و النصوص الادبية الهدف منها العظة و العبرة) طبعاً هنا بسرعة كفروه و اعتبروه مُرتد و رفعوا قضايا و حاكموه ، بينما الله يگوللنه بالقرآن ( قُلْ سِيرُوا فِي الْأَرْضِ فَانظُرُوا كَيْفَ بَدَأَ الْخَلْقَ ۚ ثُمَّ اللَّهُ يُنشِئُ النَّشْأَةَ الْآخِرَةَ ۚ إِنَّ اللَّهَ عَلَىٰ كُلِّ شَيْءٍ قَدِيرٌ ) الله سبحانه و تعالى يگلك ابحث بنفسك ما گلك اني انطيتك كل الحلول و العلوم في القرآن يريدك تفكر لانه من انطاك عقل اله حكمة يريدك تفكر والا ليش ينطينا شيء ما نحتاجه مثلاً ، لو نجي للغرب راح نشوف الفكر التنويري هو الي يحكم المجتمع ، التنوير هو ان كل شخص مسؤول عن صقل نفسه من خلال تعليمه و تثقيف روحه مايگدر احد يفرض عليه قناعات مثلنا ، الفرق بين العرب والغرب انه الغربي يجد حل المشكلة من الواقع الي يعيشه بشكل آني بينما العربي لازم يرجع يقرا لفلان مُفكر او فلان صحابي ، يا اخي حلول القدماء كانت مناسبة لعصورهم ، جريمة تحكم نفسك بقواعد مستحيل تنجح في عصرك !

 

[رامي النجفي]

تاريخ العراق الحديث و الحروب الدموية






هواي من عدنا يسئل احياناً ليش احنه عكس الدول المجاورة همه يتقدمون واحنه بعدنا بمكاننا يتباهون بناطحات السحاب ولازلنا نتباهى بـ الاورزدي و المولات هم يتباهون بشبكات الاتصال و التكنولوجيا واحنه نتباهى بـ اول تلفزيون اُفتتح بالمنطقة العربية ، الدول تتباهى بمستقبلها و احنه بـ ماضينا ، السبب واضح يا صديقي ، الحروب تُخلف الشعوب ، الحروب تخلق عندك النفس التعصبي (تصير ابو طلايب) و المُتعصب في كل حالاته الفكرية او الثقافية هو انسان عدو للأبداع ، دائماً يفكر شون راح يگدر يقتل اعداءه بينما يغفل عن خلق غد افضل لـ اولاده ، حالة الاسترخاء الي عاشوها الدول المجاورة خاصةً الخليجية خلت عدهم ذهن صافي للأبداع الخلاق ، الحرب في العراق انتجت جيل خائف و مرعوب من فكرة القتل في الحرب او قمع النظام الحاكم و هذا الخوف ورثوه للأجيال الي تلت ، وحتى بعد 2003 ، استمر هذا الخوف ، الشيعي يخاف يفقد الحكم و السُني يخاف الشيعي يستفرد بالحُكم ، بينما الكردي دائماً ويا المُنتصر لذلك تجدهم متقدمين اكثر اذا قارناهم بـ شركائهم في الوطن ، مُشكلة الحرب ممكن تبلش بـ اول رصاصة ، لكنها مستحيل تنتهي مع آخر رصاصة


الروائي الالماني إريك ماريا ريمارك في روايته (للحب وقت و للموت وقت) واصفاً مساوء الحروب و اثارها الجانبية المتبقية لفترة طويلة بعد انتهاء الحروب : ان القنابل التي سقطت على برلين ، سقطت على المدينة و الناس و اللغة و المسرح و السرير و الصداقة و علاقات الناس .......

 

[رامي النجفي]

فشل النموذج الامريكي المُطبق في العراق بعد 2003





امريكا رادت ان تخلق من العراق نموذج متطور بعد 2003 حتى تشوف العالم شون ساعدت العراق ان ينتقل من نظام البعث القمعي الى نظام ديمقراطي تعددي مفتوح ، لكن اغفلوا نقطة جوهرية انه همه كمجتمع بُني على الليبرالية بينما المجتمع العراقي عاش دائماً تحت حكم النظام الشمولي المُغلق ، عاشوا تحت ظل حكم العشيرة و تقديس الاكبر سناً و تگلهم تعالوا ديروا نظام يعتمد ع كفاءة الاشخاص ! مو بيدهم منطقياً ما راح يگدرون عقلهم ما مستوعب فكرة المدنية !

الفيلسوف البرطاني كارل وبر في كتابه (المجتمع المفتوح و اعداءه) يطرح عدة افكار منها ، المجتمعات المفتوحة الاجيال التالية اكثر تقدماً من الاجيال السابقة ، اما المجتمعات المُنغلقة الاجيال التالية اكثر تخلفاً من الاجيال السابقة ، حتى يأتي جيل جديد فيحطم افكار ومعتقدات المجتمع القديم ، فـ يصبح المُستقبل افضل من الحاضر و الحاضر افضل من الماضِ ، وان لم يحدث ، سيصبح الماضِ افضل من الحاضر و الحاضر افضل من المُستقبل


و اختم كلامي بـ اقتباس مهم لـ وبر في نفس الكتاب : الانظمة المُغلقة تطرح السؤال التالي ، منْ يجب ان يحكم ؟ ، بينما الانظمة الليبرالية لا تطرح سؤال منْ يجب ان يحكم بل كيف يجب ان يحكم ! ...........

 

[رامي النجفي]

ولأجل عين
ألفُ عين تَعمى ....!