أنا

[رامي النجفي]

مُشكلة التحرش في مجتمعاتنا هي ليست قضية واعز ديني او انحلال اخلاقي و لكن هي وصف فلسفي لنظرة المجتمع للمرأة ....

 

[رامي النجفي]

من روائع الشعر الشعبي العراقي من گال كاظم اسماعيل الگاطع

اذا صار العشگ للبيع لتعاتب المشتري ... كثّر اللوم ع باعه

الگاطع شاعر فذ لا غبار عليه ، و لكن 50٪ من القصيدة هو القاء و مع الاسف لا يُجيد الالقاء بالمرة

المرحوم كانت عنده صور شعرية مُذهلة تصيبك بالدهشة حين القراءة ، لكن حقيقةً الحلو ما يكمل

 

[رامي النجفي]

يُقال التطرف في كل شيء منبوذ الا في الحُب ، لا يكمن الحُب الا بالغيرة القاتلة ، بالتملك ، بـ انصهار الشريكين مشكلين جسد واحد

في الحب 1 + 1 =1 لآنهم هم الاثنين واحد

و من اكثر الاراء المتطرفة في هذا الموضوع مقولة الرسام بيكاسو

المرأة اما تكون آله او قمامة

اراء استقوفتني ولكن لا اتبناها انا ضد التطرف قاطبةً

 

[رامي النجفي]

عاداتي الغريبة




بيه شيء مختلف عن البقية ، ما ادري منو مثلي يصير وياه هل شيء ، اني اشوف الناس من تمر بـ ظرف صعب او مشاعر حزينة تكتب عن حزنها بـ وسائل التواصل الاجتماعي و تشاركه مع الي يهتمون لـ امرهم ، بس اني تطلب ويايه العكس ههه ، من امر بـ ظرف صعب واكون ما مرتاح نفسياً ، اكتب عن التفائل و انه الدنيا شگد حلوة و شگد عدنا نَعم ما مدركيها ، و لحد هسه اتذكر بيوم وفاة والدي من رجعنه من التشييع بليل لزمت تلفوني و كتبت هذا الكلام


اكو فد شيء استغربه ، شون اكو بعض الاشخاص ممكن يحچون للمقربين منهم مشاكلهم الخاصة و شنو الي ياذيهم !
اني ما گدرت اسوي هل شيء ابد اصلا اذا احجي بشي مضوجني راح اضوج اكثر ، چنت بالبداية اشوف اكو صعوبة ان اظهر گدام اهلي لو اصدقائي كأني طبيعي و لكن بالحقيقة نفسيتي محطمة
بس بمرور الوقت بلشت اتقن هل دور و لگيتله تفسير مهم ، انه محد راح يشيل همك ، كلمن ملتهي بهمومه ، اذا ماگدرت تساعده بـ ازالتها ع اقل ع اقل ،،، لا تحمله اكثر
وتذكر دائماً ماكو شخص سعيد سعادة مطلقة ، هي هاي الدنيا الله يشوفك حلوها و مرها حتى تحس بقيمة الاثنين و تعرف الفرق بينهم ، تهوووون الله كريم ....


و اتذكر بيوم الي خسرت بي عملي بسبب دخول داعش للعراق و راح حلمي بتوسيع العمل و النجاح الي چنت اطمحله كتبت جملة بالفيس يوك

السعادة لا تحتاج للمال
ممكن ان تصنعها من ابسط الاشياء


ما احب لحظات الضعف ، ايجوز الكلام الي اكتبه (التشجيع و التفاؤل) اني المقصود بي ، رسالة الي شخصياً ، اريد ارفع من معنوياتي ، اريد اشجع نفسي ، ما احب اكون مُحبط ، لذلك ابدا ما احب احچي عن الاشياء الي تضوجني ، اعتقد ان تجبر نفسك على النسيان هي اعظم فكرة ممكن تنتشلك من الافكار السلبية ....

 

[رامي النجفي]

شوية فضفضة





صار كم يوم عندي ظرف اجبرني ع سفر لمكان بعيد عن بيتي ، صار عندي وقت اگعد بالفندق و اتامل بالسقف لان ماعندي شيء اسويه ، اليوم واني دا احسب بالمربعات الي بالسقف الثانوي سرحت بالتفكير ، حسيت روحي كبرت هواي ، بلشت استثقل السفر و الابتعاد عن البيت ، صرت روتيني اكثر احن لغرفتي ، اريد ارجع بعد نهار طويل لبيتي ولغرفتي ، احس هذا مو مكاني ، احس نفسي ما عندي حرية ان اسوي الاشياء الي اريدها بـ اي وقت ، صارت عندي مسؤولية عائلة ، صارت عندي مسؤوليات اجتماعية ، الي يصير عنده حزن لازم اروح و اواسيه و الي يفرح اروح واهنيه ، احس روحي مو نفسه رامي القديم ، چنت اسوي اي شيء يخطر ع بالي بدون ما احسب حسابات معقدة ، مثلاً چنت من اشوف بنية حلوة اروح و اگلها انتِ كلش حلوة واتمنى نصير اصدقاء ، هسه من اشوف بنية حلوة عادي مالي خلك احچي وياها اصلاً ، هل شيء يحسسك انك كبرت فعلاً ، چنت استغرب من واحد يسولف عن حادثة مرت عليها 20 لو 25 سنة ويضحك ، هسه من اتذكر حادثة قبل عشرين سنة افكر بسرعة يااااااه معقول اني هلگد عشت ! معقول هلگد مرت بسرعة !

الموضوع مو فقدان الشغف او الخوف من الكبر ، ولا الحنين للماضي و لأيام المراهقة ، احس الموضوع اعمق ، الموضوع هو عبارة عن ترتيب اولويات ، يعني قبل خمسة عشر سنة چنت اشوف اكو هواي اشياء مهمة هسه احسها تافهة ، چان عندي هواي اصدقاء اليوم قليلين جداً ، چنت هواي اناقش الناس هسه غالبا الي يحب يناقشني ارد عليه مرة او مرتين و بعدها اگله انت صح ، چنه نسهر هواي بالنوادي الليلة اني واصدقائي وهسه صرنا نفضل ان نسهر ببيت واحد ، چان مفهوم السهر عدنا يرتبط بالصخب بسبب موسيقى النايت كلاب او الحفلات و هسه اذا صوت التلفزيون عالي واحد يگول للثاني نصيه ، قبل بكل سهراتنا لازم اكو مشروبات روحية هسه صرنا ندور گهوة و كبتشينو و يا محلاها لو اكو بليستيشن و نلعب ونضحك من گلبنا و الي يخسر يصير بطل المسرحية

چنه نرتب قبل السفرة بـ ايام وهسه بيوم السفر يلا نجهز جنطتنا وغالبا ننسى شغلات مهمة و نضطر نشتريها من غير مكان ، ايام قبل حلوة بس اعتقد لمرحلة معينة يعني حلوة لانها بذاك الوقت ، و ايام هسه هم حلوة بس لو مسويها قبل چان حتصير كلش مُملة ، اني خايف من شيء واحد انه بعد 10 لو 20 سنة اصير اتذكر ايام هسه و احنلها ، معناها راح اكون منعزل و بعيد عن الناس و اني بعمري ما چنت هيچ ولا احب اصير هيچ بيوم .....

 

[رامي النجفي]

من المظاهر السلبية في مجتمعي



دائماً تشوف اكو شخص يحب ينتقد الناس وهو ماشي بالشارع وهو ماشي بالمول وهو گاعد بكافيه ، يحب ينتقد ع كل شي شون هذا الولد شون نافخ نفسه شوف هاي البنية لابسة حصر تريد تلم الشباب شوف هذا الشايب شلون مبهذل ، تعليقات ما تخلص ، بس ابداً ما فكر بيوم يخلي نفسه بمكانهم ، الشاب الي نافخ نفسه هو شاب عنده نظام صحي تعبان ع نفسه يومية يروح للجيم و يجتهد حتى يحسن من مظهره و للعلم مظهره يخصه اله لان هو حاب هيچ انت شنو مشكلتك ! البنية الي تلبس حصر هي ثقافتها هيچ هي تحب تكون دائما جميلة ، بس تره ما مسويه هيچ لخاطر عيونك يا ابو عيون جريئة بس لان كل شخص بداخله يطمح للأعلى و هي هيچ حابة تصير انت شنو الي غاثك ! الله انطاك عقل حاول تشغله تره هاي ميزة ميزك بيها عن الحيوان ليش مُصر تتخلى عنها ! خلي الناس تسوي الي تريده ، اذا انت مُتدين غض بصرك واذا انت ما الك واهس بالرياضة (مثل المتحدث) گول ما شاء الله هذا الولد تعبان ع نفسه ، تره هاي التعليقات ماتدل ع شيء غير انك مريض نفسياً ولأنك فاشل ومحد مگلبك تريد الناس كلها تصير مثل يا فاشل يا فاشل ^_* ، اكو مثل كلش حلو يگلك : الكل مؤمن حتى تأتي العاهرة ، الكل مُلحد حتى تسقط الطائرة ، الكل شيوعي حتى يأتي المال ، الكل ثوري حتى تأتي الهجرة

الفكرة من المثل يگلك خلي نفسك بمكان الي تنتقده و راح تشوف بنفسك شنو ردة فعلك اذا شفت شخص يجي وينتقدك بس لانك ما عاجبه ، صدگني راح يكون شعور سيء جداً

 

[رامي النجفي]

مساوء العيش في الانظمة الطبقية




اذا چان عندك هدف تريد توصله ، تعلم شون تعيش لوحدك بهذا الطريق ، صحيح وجود اشخاص بقربك تحبهم ويحبوك راح يساهم بشكل ايجابي في بلوغك الهدف لكن لو فرضنا ماكو هيچ اشخاص ! لا توهم نفسك وتقرب منك اشخاص بس حتى لا تستوحش في الطريق ، احنه بزمن المقابل ما يحبلك الخير مو لانه انسان سيء بس هذا العالم الطبقي الرأس مالي الي احنه دنعيش بي من مساوئه انه المقابل يريد الخير بس اله واذا هو ما بي خير يريد يشوف الناس كلها مثله ، احنه بزمن اذا واحد شاف شخص گاعد يمدح شخص ثاني بصفاة (هو يشوف هل مديح لازم يكون اله) راح يوصف هل مديح بالتملق و الازدواجية ، مايتقبل انه الممدوح قد تكون فعلاً هذه الصفاة الحلوة موجودة بي !
امشي بطريقك صديقي والي يزعل منك خلي يزعل الدنيا ما توگف عليه خليك انسان جشع في مصلحتك احياناً الجشع مطلوب حتى لا تدوس ع نفسك لأرضاء غيرك ، امشي و باوع لهدفك ولا تهتم بنقد الي حولك ، صدگني من توصل هدفك راح تشوفهم يصفگولك ، ولا تستغرب لو اكو اشخاص من الي زعلوا عليك لو انتقدوك واحبطوك راح يتبنون نجاحك ويگولون احنه ساهمنا بجزء منه ، تعلم شون تعيش بهذا العالم الجديد ، عالم مادي بشكل كبير و قليلة جداً بيه العواطف ...

 

[رامي النجفي]

انتشار المخدرات في العراق




ذاك اليوم دا نسولف اني واصدقائي وتذكرنا مراهقتنا و حمدنا ربنا انه ما چان اكو مخدرات بشكل منتشر مثل هسه ، چنا بس نسمع بالكبسلة بس ما شايفيها ، و چان الشيء المتوفر فقط التدخين و المشروبات الكحولية و الحمد لله هذني مابيهن ادمان مثل ادمان المخدر
قريت احصائية عراقية تگول وصلت نسبة التعاطي بين الشباب اكثر من 40٪ ، تره رقم مرعب !

الي يثير فضولي شمعنى المخدرات انتشرت في الطبقة الفقيرة ؟ المعروف دائما ولد الاغنياء هم الي يتجهون لهذا السم ، بعدين منين ديجيبون كل هاي فلوس التعاطي ! تره شيء غريب يخليك تصفن وما توصل لجواب !!

 

[رامي النجفي]

الشعور بـ الاكتفاء




من اني مراهق اعتمدت ع نفسي بالشغل و غادرت بيت اهلي وسكنت بمدينة ثانية لوحدي حتى اشتغل ، چان عندي شغف اريد اجرب شعور ان اكون مسؤول عن نفسي بعيداً عن والدي رحمه الله ، اشتغلت مدير مشتريات و بتجارة العدد اليدوية و تجارة المكائن الزراعية و تربية العجول و الزراعة و دخلت بشغلة العقارات ، ما عدى قضية جانبية چنت امارسها كـ هواية وهي بيع وشراء الاسهم ، و درست كلية و تخرجت ، حالتي المادية چانت جيدة ، طبعاً كل الدخل الي يطلعلي چان الي بس ، وما چنت اعرف ادخر المال ، كلما اجمعلي كم فلس اخذهن و اسافر بيهن واتونس ، زرت هواي اماكن ، تعرفت ع ثقافات ، و الاحلى بالنسبة الي انه تعرفت ع اشخاص جدد ، بس انظر لنفسي هسه احسد روحي اگول شون چان الي هيچ خلگ ، مع العلم اني بعدني ماصرت شايب ، بس احس انطفت شعلة الحماس للتجارب الجديدة بداخلي ، صرت هواي احسب حسابات بداخلي لكل خطوة ، من افكر هسه اگول شعجب وصلت هذه المرحلة من وكت ! ، المفروض ابلش احس هيچ من اصير بالخمسينات او الستينات ، ما اعرف بس احس اصلا العيش بالعراق و بوسط هذه الظروف يخليك تكبر بسرعة و كأنما اكتفيت من هذه الدنيا بكل بساطة ! ....

 

[رامي النجفي]

مع اني مو من متابعين نادي نابولي و لكن هذا الموسم بلشت اتابعهم مو حباً بيهم ولا بالكرة المجنونة الي يقدموها النه على طبق من المُتعة
و لكن احقاقاً للحق المُعلق فارس عوض هو منْ سوق لنا جنون الكالتشيو هذا الموسم
بحيث بدأ يرتبط اسم فارس عوض مع العظمة التي يقدمها نابولي
مُجرد ما تسمع حماس و تفاعل فارس راح تصيبك القشعريرة و تتمنى تسجيل نابولي لتستمتع بتعليق فارس عوض
فارس عوض + نابولي = عشق و جنون


كم نحنُ محظوظين بكَ يا فخر المُعلقين

نابولي يا سلام نابولي انتهى الكلام نابولي مسك الختاااام

اوسيمين يارباااااه
قضية اوسيمين خارج الملعب اغُلقت