مقدمة بعيد عنك - ام كلثوم
المقدمة التي حيرت كبار الملحنين
هذه المقدمة البديعة التي اجمع عليها جميع النقاد والفنانين كانت مــن صنع بليغ، في البداية يتراقص القانون بجملة رشيقة ؏ــلىٰ مقام الكرد، وبعدها يغير آلة ومقام وايقاع ينتقل للبيات بإيقاع المقسوم والاكورديون.
بليغ الملحن الذي قالت عنه ام كلثوم في تعاون بينهم " فين الواد المگنون ده "
وقال عنه عبدالحليم " بليغ أمل مصر في الموسيقى "
اغنية لي بها ذكرى لا انساها ابداً
بـ ٢٠١٠ چنت احب،
احب بكل گلبي وبكل قوتي ، رغم چان حب بفترة مراهقة ، وصار مــن نظرة وصدفة ووقت قليل.
چان مــن هذا الحب الي يخفق بي گلبك كلش قوي ، بحيث تخاف مــن دگة گلبك بگد ماثگيلة ، ويخليك تلزم صدرك خاف گلبك يطلع مــن مكانه.
ومن يصعد الاحساس والاشتياق العيون تدمع وهيج.
المهم،
بيوم شتوي،
دزتلي مسج ع الخط مصطفى افتح نت.
هي چانت بغير محافظة واني راجع من بغداد وأهلي باقين هناك وگاعد ببيت جدي.
بذاك الوكت، ماكو نت بالبيوت، وعلى الخط مكلف كلش.
رحت لمركز النت مسافة ٣٠ دقيقة مشي او اكثر.
فتحت الياهو ربع ساعة يلا فتح الا شوية اتوسل بي وابوس الشاشة مــن اللهفة ، گولو فتح ، وحچينة ، گالت راح ادزلك اغنية كلما تسمعها تذكرني ، دزت الاغنية وساعة يلا نزلت
لأن النت چان سلحفاتي وعبالك مكنك ؏ــلىٰ برج مال طيور مــوو برج نت.
رجعت الطريق كله اسمع بيها ومن تخلص اعيدها واعيش وأحلم وية كل كلمة تگولها.
چانت باردة ، ومن رجعت الطريق كله اني دافي..
الاغنية چانت " انت ؏ُــمـري " ام كلثوم .
ولحد الان ، مــن أسمعها ترجعني لذاك المشهد. الشتا والطريق والانتظار واللهفة وإحساسي مــن سمعتها أول مرة.
البنية راحت مــن سنين طويلة، وهسة هي ببلد بعيد، وعلى الأغلب متزوجة.
وتلاشت كل الاحاسيس الچانت بداخلي الها والي چنت اعيشهن وياها، بَــس ضلت الاغنية عايشة ..
مرات نصير اقوياء وننسى ونحاول نستعيد حياتنا ونرجع نعيش مــن جديد، بَــس هالشي يكلفنا هواي مــن أنفسنا ومن مشاعرنا ومن هواي اشياء بداخلنا..
بس دائماً، اكو شي اقوى مــن عدنا واكبر من مجرد نسيان ..
