أنشر مايعجبك من اشعار ✾ دارميات ✾ ومضات ✾ ابوذيات ✾ قفشات ✾ زهيريات ✾

[mohammed.shams]

شميتك گبل ماقاومت وياي
ولميتك نفس واتعثر بلمك
وهسه تريد اشمك خايف آنه اعليك
يمكن راح اخلصك لمن اشتمك

 

[mohammed.shams]

سألوني وتهت من رادوا يسألون
ياهو انته بهويتك ياإسم شلته
جاوبت بصراحة وچنت افكر بيك
نسيت اسمي الثلاثي وجاوبت انته
==============

 

[mohammed.shams]

إذا عينك سفينة تسابق الإعصار
أكيد السفن يمها بلا وشك ترسي
ولأن خايف تحسدك ياحبيبي الناس
عليك الفلق أقره وآية الكرسي

 

[mohammed.shams]

جمالك معجزة وخدين مو خدين
كلش ضاويات ونورهن يسطع
وهيه المعجزة بخدودك الحلوات
لأن أول گمر وية الشمس يطلع

 

[mohammed.shams]

بس اوياك احسن روحي تريد
وغيرك ماشفت حته آنه اريدن
واگف عالمنصة ومن جبت طاريك
گمت لروحي اصفگ حتى اعيدن

 

[mohammed.shams]

چنت آنه اويه غيرك كلي اجروح
أتعنه المصايب والچم اجروحي
لكن منعرفتك گمت احب الروح
ومن گد ماأحبك گمت احب روحي

 

[mohammed.shams]

شاعر عاش عمره بحسرة العوز
وشاعر بالترف من عاش عمره
شوف انته الفرق مابين الاثنين
ياشاعر تحس من تقره شعره

 

[mohammed.shams]

بالحلم چن نهر دجلة بلايه ماي
ناشف ومرمية بي جثة قتيل
واسألت گالولي شارد للفرات
لأن شاف ابمايه ورقة اتگول شيل

 

[mohammed.shams]

أحب روحي گمت شعلية بالناس
خل اللي يگول ايگول اناني
چي غيرك بعد ما حبت الروح
أحب آني گمت چي احبك آني

 

[mohammed.shams]

أگول مزاعلك حته آنه اراضيك
لأن وكت الصلح تغفه ايدي بيدك
واگلك ما أريدك خاطر اتشوف
أحبك حته لمن ما أريدك